Color matching guide...تنسيق اللوك

-

صباح الخير...

 

في أكثر من موضوع ببالي...كتبت موضوع يخص الميك أب عن تغطية الأكني الحبوب والآثار...بنص البوست افتكرت انو آخر بوست كان عن الميك أب...أنا مليت فكيف انتو...ع طول غيرت و اخترت دا الموضوع لأننا ع نهاية الشتوية...وبعدو الصيف ان شاء الله فصل الألوان والانتعاش...

 

 

 

الألوان...تضيف لحياتنا حياة ورونق وانتعاش...تغير بنفسيتنا كثيييير...حتى انو في طب للعلاج بالألوان...كولر ثيرابي

 

 

شايفين الألوان...بالرغم من انو الجاكيت في أكثر من لون...الا انو أنيق ومتناسق وماتحسوا انو ألوانو كثيرة...أو انو مزعج للعين...

 

اش السبب؟

 

 

 

 

السبب هنا...

 

عجلة الألوان...دي العجلة هي اللي يعتمدوا عليها الستايليست و مصممين الأزياء العالميين

 

طيب كيف نستخدم دي العجلة؟ و كيف تساعدنا في تنسيق ألوان لبسنا؟

 

راح أحاول أعرضها لكم بأبسط طريقة...وبالصور

 

بس قبل ما نبدأ...نتفق انو في ألوان اسمها الألوان الطبيعية وهي الأسود والأبيض والكحلي والبني والرمادي...

وانو دي الألوان ماتحكمها قاعدة عجلة الألوان لأنو نقدر ندخلها مع أي لون

 

نشوف كيف...

 

 

أول طريقة وأسهل وأبسط طريقة...هي اختيار لونين متقابلين...زي الصورا

تقدري تنسقي أي لونين متقابلين...واذا كنتي حابة تدخلي لون ثالث لازم يكون واحد من الألوان الطبيعية

 

مثلا أحمر مع أخضر ومعاهم اما أسود أو أبيض

 

 

زي كدا...حتكون ألوان لبسك زي اللي فوق مع الأبيض أو مع الأسود زي اللي تحت

 

 

ثاني طريقة انو تختاري ثلاثة ألوان جنب بعض...أو لونين جنب بعض...المهم مو أكثر من ثلاثة أبدا...اذا كنتي حابة تدخلي لون رابع معاهم لازم يكون لون من الألوان الطبيعية

 

 

زي كدا

 

 

 

ثالث طريقة...وهنا تبدأ الجرأة في اختيار الألوان

انو يكون تنسيقك بشكل مثلث...ثلاثة ألوان...وتقدري تدخلي معاهم لون طبيعي

 

 

 

هنا مع الألسود أو الأبيض

 

 

 

 

رابع طريقة كمان مثلث...بس لاحظوا انو شكلو يختلف عن المثلث السابق

 

 

 

كمان مع الأبيض و الأسود...عجبوني مع الأبيض أكثر

 

 

 

 

هنا طريقة المستطيل...تختاري أربعة ألوان...وعشان يكون تنسيقك صحيح استخدمي المسطرة عشان لا يميل الخط وتختاري لون خطأ

 

 

 

هنا مع الأسود و الأبيض...دايما أفضل الأبيض معاهم...ودا رأيي الشخصي

 

 

آخر طريقة هي الطريقة المربعة

 

 

برضو حبيت التنسيق مع الأبيض

 

الطريقة مرا سهلة وممتعة...مع الممارسة حيسهل عليكي الموضوع وحتصيري تنسقي بسهولة بدون ماترجعي للعجلة

عينك حتلقط الألوان المتناسقة بدون تردد...حتى لما تروحي المول وتتسوقي حتختاري بسرعة الألوان اللي ترتاحلها عينك

دا اللي يسموه حس

 

تنسيق الألوان مايقتصر ع اللبس والاكسسوار والشنطة والشوز بس

يمتد للروج والمناكير

 

اختاري الروج سواء لحمي أو فوشي أو بينك أو أحمر باللي يتناسب مع ألوان لبسك

 

مرا شوفت موضوع استشارات في منتدى...وكانوا البنات يسألوا عن ألوان الروج أو المناكير اللي تناسب لبسهم...

مثلا تدخل وحدة وتقول لون لبسي كدا وكدا اش الروج المناسب؟

وتجيها الردود مختلفة...كلا يرد ع حسب هواه وذوقو الشخصي...مافي أي تناسق

 

نفس دي القاعدة تقدري تطبقيها في الديكور وحتى تغليف الهدايا

خلوا حياتكم مليئة بالألوان بطريقة جميلة وفيها ذوق

 

 

 

 

 

كيف لقيتوا الموضوع ؟ سهل؟

 

أشوفكم في بوست جديد ان شاء الله

 

تسعدني تعليقاتكم...وتابعوني ع الانستغرام

 

SOSANITA90

 

 

 

 

 

Glycolix *_*

صباح الخير...

دا البوست المفروض أنزلو من زمان وكثير بنات وعدتهم فيه وسألوني عنو...بس كنت حابة أتأكد من شي بسيط قبل لاينزل البوست...دا سبب التأخير

مجموعة جلايكوليكس هي مستحضرات أحماض فواكه...ماراح أبالغ وانو وااااو والمنتج السحري اللي ممكن يقلبكي 180 درجة...لأنو بجد بجد تعبنا من دا الاسلوب...أنا زيي زيكم قبل ما أصير بلوقر كنت أقرأ في المنتديات و ع الانستغرام و لبلوقرز...وكنت أشوف المبالغات...دا الموضوع كان مرا يقهرني ويستفزني...مو انو الوحدة صارت بلوقر لازم تمدح وتمدح وتقطع المنتج مدح وتغرق التاجرة اللي تشتري منها مجاملات لأنو الموضوع صار مجاملات وتمشية شغل ع حساب المتابعة...اللي كل ماقالت البلوقر دا الشي حلو راحت اشترتو...

دا السبب بالذات من الأسباب اللي شجعتني ع اني أعمل مدونة...

نجي للجلايكوليكس...حقولكم في البداية بشكل بسيط فائدة أحماض الفواكه...
تعمل تجديد للبشرة يعني تزيل الطبقة الميتة عشان تكون عندنا بشرة جديدة صحية ونضرة وصافية...وتنعم البشرة...تنعمها يعني تخفف من ملمس المسامات تخفيف بس مو تخفيها ولا هي شي معجزة...وتنعم الخطوط السطحية الناااعمة اللي مع الزمن تصير تجاعيد...يعني وقاية من التجاعيد المبكرة...مو انو بشرة فيها تجاعيد واضحة وتزيلها

الجلايكوليكس...ما تبيض ولا تقشر تقشير قوي...

طبعا لوحابة تستخدميها حتبداي من تركيز 10%...بعد ماتخلصي الكورس...تخلي بشرتكي ترتاح فترة مو أقل من شهر...والمفروض أكثر...اذا كنتي حابة تعيدي الكورس مرا ثانية...استخدمي تركيز 15%

لاتبداي بالـ15% في أي حال من الأحوال...

الكريم حتستخدميه مرا وحدة في الليل قبل النوم...ولما تصحي حتغسليه بغسول ( عادي ) بعدها اذا كنتي ماحتخرجي استخدمي مرطب عادي...ووقت الخرجة في النهار استخدمي صن بلوك أو واقي شمس...

أهم نقطة  ياريت تنتبهوا عليها...انو في غسول جلايكوليكس...وفي بنات يستخدموا اللاين كامل غسول وكريم...ودا غلط ...
لأنو البشرة تتقشر بالكريم ولو استخدمنا الغسول حتجف البشرة وتحمر وتتحسس مرا...وتتهيج...
المفروض نستخدم غسول عادي عشان يهديها وما تصير عندنا  نتايج عكسية...ودا كلام الاستشاري ليا...

كاتبين في الموقع انو تستخدم لمدة ثلاثة شهور...ثلاثة شهور فترة مرا طويلة وقوية ع البشرة...أنصح باستخدام علبة كريم وحدة...ألين تنتهي الكمية...كأقصى حد شهر ونص...

بالنسبة للوشن الجسم...أغلب اللي استخدموه ندموا وماحصلوا ع أي نتيجة...أنصحكم ماتشتروه...

سيروم العيون...كاتبين انو يشيل الاسمرار يقصدوا الهالات...اللي عندها هالات بالذات الوراثية  ماحيزيلها أبدا...


دحين شوفوا المعلومات من موقع جلايكوليكس...

تعمل أحماض الفواكه على إزالة الطبقة السطحية من الجلد والتي تحتوي على خلايا ميتة، متيحةً للخلايا الناضجة لتكون على السطح. إزالة هذه الطبقة  يحسن من ليونة وطراوة البشرة ويخفف من التباين في الصبغة وبالتالي يعطيها منظراً ناعماً ومتناسق اللون، كما تزيل أحماض الفواكه الترسبات المتراكمة في المسام وبالتالي تساعد على تحسين المسام الواسعة، وكذلك تقلل من التجاعيد السطحية والتي تظهر مع التقدم بالعمر.


جلايكوليكس 10 % كريم للوجه

تحتوي على 10 % من أحماض الفواكه التي تساعد في تعجيل إزالة خلايا الجلد الميتة وبالتالي سرعة نمو خلايا جديدة تؤمن نعومة وطراوة للجلد، تحتوي على فيتامين أ وفيتامين ج وفيتامين هاء للتخفيف من المؤثرات الضارة بخلايا الجلد، كما تحتوي على مواد طبيعية مضادة للأكسدة، ومواد أخرى للحفاظ على رطوبة الجلد.

هذه المنتج لا يساعد على ظهور الزيوان، كما أنه خالي من المواد الحافظة.

ينصح باستعمال التركيز الخفيف أولاً (10%) لمدة ثلاثة أشهر بعدها يمكن استعمال التركيزات الأعلى.

لا بد من استعمال واقي مناسب من الشمس أثناء الاستعمال.

طريقة الاستعمال

بعد تنظيف البشرة توضع كمية مناسبة على الجزء المرغوب (الوجه)، ويستعمل من مرة لمرتين أو حسب إرشادات الطبيب.

 بعد الوصول للنتيجة المرغوبة يستمر استخدامه مرتين أسبوعياً للحفاظ على البشرة.

 

سيروم العيون:

 

الاسمرار والترهل أسفل العينين مشكلة يعاني منها الكثير، هذا المنتج يعيد الشكل الطبيعي بواسطة المادة الفعالة حمض الهياليورونيك، والذي يعطي للبشرة ترطيب فعال خاصة لمنطقة حساسة مثل البشرة حول العينين. يحتوي هذا المنتج أيضاً على فيتامين أ وفيتامين ج وفيتامين هـ ومساعد الإنزيم كيو عشرة ( Coenzyme Q-10 ) ومواد طبيعية أخرى تساعد في التخفيف من تأثير المواد الضارة بالبشرة، بالإضافة لجعل البشرة تبدو أكثر نعومة ونظارة ويظهر ذلك يعد استعماله لفترة مناسبة.

طريقة الاستعمال

بعد تنظيف البشرة توضع كمية مناسبة على الجزء المرغوب، ويستعمل من مرة لمرتين أو حسب إرشادات الطبيب.

 بعد الوصول للنتيجة المرغوبة يستمر استخدامه مرتين أسبوعياً للحفاظ على البشرة.

 

أخيرا دي الأسعار...

 

 

اممممم وبس دا كل شي عن جلايكوليكس...أشوفكم ع خير باذن الله...

طريقة اخفاء الهالات السوداء باحترافية...

صباح الخير...كيفكم...

جاتني أسئلة عن طريقة اخفاء الهالات السودا...وبصراحة من قبل الأسئلة كنت ناوية أكتب عن دا الموضوع...لسبب معين...وهوا اني دايما أشوف بنات عارفين للميك أب بس اللي مخرب عليهم الدارك سيركلز أو الهالات السودا...وبعضهم تكون هالاتهم خفيفة ومع الميك أب تزيد سوء...

 

 

كلنا نتمنى نوصل لدي النتيجة...الهالات مخفية تماما والمنطقة تحت العين نظيفة ومنورة

دي طريقة مكياجي داااايما...والحمدلله دايما أوصل لدي النتيجة

اليوم راح أعلمكم خطوة بخطوة طريقة الكونسيلر الصحيحة

 

السر مو في الكونسيلر ولا هوا في ماركة الكونسيلر...

 

عشان توصلوا لدي النتيجة تحتاجوا ثلاثة منتجات...هم:

 

الكوريكتر و الكونسيلر واللايت

 

الكوريكتر...هو منتج يصحح تون البشرة...بشرتنها لها تون معين ومع سواد تحت العين يتغير التون

كوريكتور الهالات السودا يكون باللون الأورانج وقوامو يكون كريمي ثقيل شويا

 

 

دا الكوريكتر...طبعا متواجد بكل الماركات تقريبا...

 

الكونسيلر يكون بدرجة بشرتنا ويكون لونو بيج مايل ع الأصفر

وقوامو كريمي أخف من الكوريكتر بنتفة

 

 

آخر شي اللايت اللي هوا الاضاءة اللي تنور المنطقة اللي تحت العين

وتكون بدرجة أفتح من بشرتنا بنتفة وقوامها خفيييف

 

 

دا اللايت...وفي من ماركات كثيرة...واللي كثير بنات يستخدموه لحالو ع أساس انو كونسيلر ودا الشي غلط ويزيد المشكلة عندهم

وأشهرهم سان لوران تتش اكلا وبديلو تبع بودي شوب ومايبيلين

 

تعالوا نشوف الخطوات...

 

 

حاولت أدور مقطع واقعي أقدر أشرح عليه...ولقيت دي الهندية هيا أقرب شي للواقعية...

هنا بشرتها قبل لا تبدأ

لاحظوا الهالات والسواد حول فمها و أنفها...

 

 

بعد الخطوات الروتينية اللي هيا تنظيف البشرة بالغسول والترطيب...وزعت الكوريكتر...ولاحظوا القوام واللون الأورانج...

 

 

بدي الطريقة...وزي ما شرحتلكم ع الانستقرام...انو يكون بشكل مثلث

 

 

هنا تصحح اللون حول فمها

 

 

 

هنا بدأت بخطوة الكونسيلر...واللي لونو مايل ع الأصفر...دققوا ببشرتها بعد ماوزعت الكوريكتر أبدا مو واضح اللون الأورانج

والهالات خفت شويا

 

 

 

 

هنا بعد ماوزعت الكونسيلر...واكتفت بس بدي الخطوتين...

النتيجة مرا حلوة ومبين انو طبيعة بشرتها صافية وموحدة وبدون هالات

 

مثال ثاني أحلى بكثير

 

 

شايفين الهالات السودا والخطوط!!!

 

 

شايفين درجة الكوريكتر...أووورانج

 

 

وزعتو بالطبطبة باستخدام اصبعها

 

 

بعدين دمجتو بالفرشاية

 

 

بعد كدا استخدمت كونسيلر بلون أغمق من بشرتها بشويا...لاحظوا قوام الكونسيلر

وعملت نفس خطوة الكوريكتر...وزعتو بالطبطبة باصبعها وبعدين دمجتو بالفرشاية

 

 

دحين وصلت لخطوة اللايت...واستخدمت لايت بلمعة بسيطة من سماش بوكس

عموما كل اللايتس من أي ماركة يكون فيها لمعة بسيطة أخف من البيقمنت

 

 

واضح هنا انو اللايت لونو فاتح وقوامو مرا خفيف

 

 

آخر خطوة استخدمت اللوزباودر للتثبيت

 

 

وزعتها بالضغط بالاسفنجة

 

 

 

نتخلص من الزايد بالفرشاية...ونمسح من الزاوية الداخلية للعين لبرا

 

 

شوفوا الفرق...طبعا هنا بدون فاونديشن ولا أي شي...ومبينة كأنها طبيعية

 

النتيجة اللي دايما نشوفها ع السليبرتيز المشاهير...والميك أب آرتيست ...ما تكون نتيجة كونسيلر والسلام

لأ...الموضوع فيه طبقات وطبقات و أكثر من منتج...

 

طيب واللي ماعندها كوريكتر...أقولها مو لازم تشتريه...

ترا الميك أب آرتيست مو كل شي يشتروه زينا...لأ...يبتكروا ويستخدموا المنتج الواحد أكثر من استخدام

ودا كلام ميك أب آرتيست...يقول انو الكوريكتور هوا يعملوا بنفسو

 

شوفوا الطريقة

 

 

 

 

تستخدمي أي كونسيلر عندك...هنا استفيدي من الكونسيلرز اللي ماناسبتكي واستغليها بشي ثاني...

طبعا شايفين اليد يد رجال لوووووول...لأنو ميك أب آرتيست مشهور

 

 

حنحط شويا من الكونسيلر مع شوية روج أورانج...وتقدري تستبدلي الروج بشادو أورانج

 

 

...

 

 

ندمج كويس...وكل شويا ضيفي نتفة من الروج ألين توصلي لدرجة الكوريكتر المناسبة

 

 

وصار عندنا كوريكتر

 

سهل مو؟

 

 

نقطة أخيرة حابة أذكرها لكم

انو دي الطريقة تستخدموها لأي بقع غامقة وبنية في الوجه...مو بس للهالات السودا...

تقدري تخفي فيها تفاوت اللون حول الفم و آثار الحبوب

 

وبس كدا

أشوفكم ع خير ان شاء الله

 

أي سؤال تقدروا تسألوه في الكومنت...وتابعوني ع الانستقرام sosanita90

 

 

تجربتي مع الليزر...هنا اجابة لكل تساؤلاتكم واستفساراتكم

السلام عليكم...

وصلتني استفسارات كثيرة عن الليزر وتجربتي معاه...دا البوست باذن الله حيكون اجابة لكل تساؤلاتكم...

بحكم تجربتي الناجحة الحمد لله مع الليزر من خمسة سنوات...وتجارب اخواتي كمان...صارت عندي خبرة في الليزر...ومرجع لبعض صاحباتي وقريباتي...

أول شي التهمة اللي للأسف موجهة لليزر انو يزيد الشعر وانو بعد فترة يطلع دا الكلام كلو غلط...

أولا لازم نتفق انو الليزر فعال مع الشعر الأسود...يعني كل ماكان الشعر ثقيل وأسود كل ماجاب الليزر نتيجة ممتاااازة...

دايما أسمع بنات يقولوا أنا شعري ثقيل و أسود يبغالي أكثر من جلسة والليزر ما حينفع معايا...بالعكس مين قال كدا...انتي يمكن ماتحتاجي الا جلستين وصارت البشرة صافية ونظيفة وزي الفل...

تخيلوا معايا انكم رايحين تعملوا ليزر...يعني حآخدكم بزيارة وهمية خيالية لوووووووول...

قبل الليزر بيومين المفروض ما تسكربي بشرتكي ولا تعملي حمام مغربي...عشان لا تزيلي الطبقة الدهنية الطبيعية بالبشرة ووقت الليزر تتحسس بشرتكي...

في بنات يروحوا العيادة بدون مايشيلوا شعر المنطقة اللي يبغوا يعملولها ليزر...بحجة انو الدكتورا تكشف وتشوف الشعرة وتحكم ع قوة الليزر اللي حتستخدمو لها...وتجلس الممرضة تحلق لهم بالشفرة في العيادة...ييييك...ليه كدا بس!!!

قوة الليزر مالها علاقة بالشعرة لا بسماكتها ولا لونها...قوة الليزر ع حسب لون البشرة...البشرة البيضا يستخدمولها درجات عالية من الليزر...والسمرا درجات منخفضة...
ليه؟

لأنو الليزر جهاز مايشوف الا اللون الأسود وتدرجاتو...اذا استخدمنا درجة عالية ع بشرة سمرا راح يحرق الشعرة والبشرة...

كدا اتفقنا؟

طيب...اش المنطقة اللي حتليزريها لووووووول اش رايكم بس بالمصطلح...المهم...دا يعتمد ع الشعرة نفسها...

الليزر جهاز يعمل بالعكس...كيف؟

الشعرة السودا السميكة يقضي عليها...والشعرة الخفيفة الناعمة يزيد سمكها وسوادها ويخللي المنطقة مشعرة وماعاد ينفع فيها الليزر...

في عيادات عندهم أمانة...اذا شافوا المراجعة ماعندها خبرة وجاية تعمل ليزر...ما يعملولها في المناطق اللي شعرها وبري وناعم حتى لو طلبتهم...و في عيادات أهم شي عندهم المكسب المادي...آخدين الشغلة تجارة...

في بنات عندهم منطقة الزند شعرها ناعم وخفيف حرام يلعبوا فيه بالليزر لأنو حيكثف ويصير مأساة...
ونفس الشي الوجه...أعرف وحدة عملت وجهها كامل وكان شعر وجهها وبري خفيف...في شعر لكنو ناعم...صارت كأنها رجال بلحية...ووصلت الستة جلسات ومانفع معاها...وعمرو ما حينفع...لأنها ضربت منطقة أساسا الشعر فيها ناعم وخفيف...

طيب في البيت قبل موعد الجلسة بيوم حتشوفي المنطقة اللي تنطبق عليها المواصفات المناسبة لليزر...يكون شعرها كثيف وسميك و أسود...وحتحلقيها...ليه قبلها بيوم؟ لأنو لو حلقتي بنفس اليوم الليزر  حيحرقكي في المناطق المخدوشة و المتحسسة من الشفرة ...أوكي؟

يوم الجلسة حتلبسي شي واسع وقطن...عشان بعد الجلسة ما تتحسس بشرتكي...أشوف بنات يجوا العيادة بجينزات ضيقة...ليه طيب؟ وبعدها يشتكوا من التحسس والحروق والاسمرار ويسبوا الليزر ويشوهوا سمعتو...

وقت الجلسة حيكون في شوية ألم...بعد الجلسة حتوزع الممرضة ع المنطقة اللي ليزرتيها كريم أبيض يهدي الاحمرار...دا الكريم هوا مرهم اليكا...

أفضل وقت تعملي فيه الليزر هوا الشتوية...واذا عملتيه في الصيف...حاولي تروحي بدوام المسا عشان الجو يكون برد شويا...
و أهم شي لا تتعرضي للحر ولا الشمس لمدة 24 ساعة...ولا تستخدمي أي شاور جل ولا صابون ولا لوشن...

بعد الجلسة باسبوعين تقريبا...حتطلع نقط سودا في بشرتكي...وهنا حتبكي وتندبي حظك...و تندمي...وصاحباتك و أهلك اللي مو مقتنعين بالليزر...حيتشمتوا...ويقولولك شوووووفتي كييييييف قولنالك ونصحناكي وماسمعتي كلامنا...وفلانة حتقولك البنت الفلانية انحرقت من الليزر واللي تقولك في بنت ماتت من الليزر لووووول...عادي جدا تسمعي دي الأفلام الهندية...
أهم شي من يضحك أخيرا ههههههه...

بعد الاسبوعين حيطلع شعر كثييير و أسود بمجرد ما تسحبيه بيدك حينزل معاكي...عادي سيبيه ياخد راحتو لا تتهوري وتلعبي فيه...دا كلو البشرة تنظف نفسها من الشعر وكل البصيلات تخرج شعراتها...

ملاحظة مهمة: مو شرط بعد اسبوعين...ع حسب البشرة...أنا ما طلع الا بعد شهر ونص...
المهم اللي حيطلع حيكون زي الميت تقريبا...مو شعر في حالتو الطبيعية...

بعد شهرين يكون اكتمل نموه...هنا يجي وقت الجلسة الثانية...احلقي بالشفرة...وروحي اعملي الجلسة الثانية...

بعد الجلسة الثانية اذا طلع فهوا حيطول مررااااا ع بال مايطلع...ولما يطلع حيكون نااااعم وخفيف ومتفرق...يعني حتشوفي في مناطق ماطلع فيها أبدا...
وفي ناس خلاص مايطلع نهائي...

عني أنا احتجت ثلاثة جلسات وقضيت عليه الحمد لله...

أهم نقطة يابنات...انو الجلسة الثانية لا تتأخري فيها...اذا اتأخرتي حيقوى الشعر وكأنك ما عملتي شي...
وأهم شي...لا تشيلي بالحلاوة ولا الفتلة و لا الشمع ولا الملقط...ولا بأي طريقة نزع شعر...

لأنو اذا نزعناه حتتنزع معاه البصيلة اللي قضينا عليها بالليزر...و حتطلع مكانها بصيلة جديدة...وحنرجع لنفس الموال ولااااا كأننا ساوينا ليزر...ويروح شغلنا ع الفاضي...

عشان كدا البنات اللي يعملوا ليزر ويطلع بعد شهرين أو أكثر و أقل بشويا...ييأسوا و يروحوا يشيلوه ويقولوا مانفع معانا الليزر...

بعد الجلسات...حتنعمي ببشرة بيبي صاااافية و نظيفة ومافيها مسامات بالذات الساق...ووداعا للشعر وألم الحلاوة وعذابها...

بالنسبة ليا عملت جلساتي زماااان بعيادة وفاء طلبه...ومرا غاااالية للآن غالية...عملت الساق للركبة ب 1700 ريال الجلسة الوحدة...رغم انو في عيادات يعملوا الفل بودي بدا السعر...

طبعا الليزر ما يفرق من عيادة لعيادة...لأنو هوا مجرد جهاز وينضبط ع الدرجة المناسبة وبس...أهم شي انكم تسألوا عن نوع الجهاز المستخدم...اذا قالولكم جنتل ليز اتكلوا ع الله وابدأوا الجلسة...لأنو الجنتل ليز هوا أفضل جهاز...

وتذكروا يابنات...لا تاخدكم الدنيا وحبها...ايوا نتجمل ونهتم ونتدلع بس بعيدا عن الحرام...خلوا ربنا قدام عيونكم...
الأفخاد تدخل من ضمن الحرام...ومنطقة البكيني...تذكروا انها عورة مغلضة...بأي حق تشوفها فلبينية؟
ماراح أتكلم عن الخجل والحياء...لأنو دا الشي يمكن يكون منزوع من بعض البنات الله يهديهم...
ومن ترك شيئا لله عوضه الله خيرا منه...

و في عيادات يوفروا الليزر الذاتي لمنطقة البكيني...


أتمنى اني كدا جاوبت ع كل استفساراتكم...و أي استفسار أنا حاضرة للاجابة عليه باذن الله...

انستغرام sosanita90