مساء الخير ع الجميع
دا البوست كان ببالي اني أنزلو متأخر شويا...لكن في معلومة صغيرة مرتبطة فيه ماتحتمل التأخير
فقولت ليه ما أكتب دي المعلومة دحين والباقي يكون ببوست ثاني ان شاء الله...
bath and body works...أفضل محل بالنسبة ليا من محلات الشاور والعناية...واللي جربت أي منتج منو أكيد انها حبتو وسحبت ع باقي الماركات...
لأسباب كثيرة...بمجرد ما أدخل المحل أرتاح نفسيا...جو المحل يحسسكي بالدلع والاهتمام تحسيه كلو نظافة...صح انو بأوقات مايكون مرتب مرا بس عادي أتغاضى عن دا الشي...أحسن من محلات كثيرة لا ترتيب ولا برودكتس تستاهل ريال واحد
ديكور المحل واضح وتقدري توصلي للشي اللي تبغيه بدون ما تطلبي مساعدة الموظف و تحسي بالحرج
غير كدا...عندك خيارات متعددة الشي اللي يتيح لك المجال انك تختاري الشي اللي يرضي ذائقتكي...
غير الأسعار المناسبة و أحجام المنتجات أكبر و أوفر ووقت التخفيض تكون الأسعار مرا رخيصة
دا بشكل عام...المنتجات اللي جربتها منهم ونتائجها الرائعة ورأيي فيها حيكون ببوست ثاني ان شاء الله...حيكون ريفيو كامل.
لكن
من فترة شهور فجأة شوفت محل جديد للوهلة الأولى فكرتو هوا نفسو باث آند بودي ووركس...نفس الديزاين وترتيب المحل والمنتجات نفسها بالتكة...يعني اللي تدخل المحل بدون ما تدقق في اسم المحل من برا...مليون في المية حتشتري وتخرج وهيا ما شكت ولا واحد في المية انو مو نفس المحل...
وقتها لما شوفتو مرا اتنرفزت لأني عارفة حركات الوكلاء عندنا...يحبوا التخريب واللف والدوران...
وقتها جاء ببالي انو مرا وحدة بتقوللي انو محل باث آند بودي ووركس فتح في النور...و أنا أقولها ما شوفتو...الا تقوللي الا متأكدة واشترينا أنا و أخواتي منو أغراض...وقتها افتكرت كلامها وعرفت انها تقصد دا المحل...
نسيت أقولكم اسمو...Caramel bath and body
شايفين تقارب الاسم...
المهم اني مريتو...وكان في ناس كثير يشتروا منو ع بالهم انو هوا نفس الماركة...حاولت ألاقي الفرق بنفسي
أول شي لا حظتو انو كل المنتجات صناعة صينية بينما الماركة الأصلية صناعتها بريطانية وببعض الأوقات تلاقي انو التعبئة أميركية
لكن مستحيل تلاقي شي صيني...
الشي الثاني...روحت أجرب المنتجات اللي أنا مجربتها و عارفتها مزبوط عشان أقدر أحكم...لقيت انو في اختلاف كبير في الريحة وما حيلاحظ دا الاختلاف الا اللي استخدمت الصناعة البريطانية...
جربت الزبدة ماكان ترطيبها بنفس قوة ونعومة ترطيب الماركة الأصلية...حسيت كأني أجرب شي من بودي شوب...
هنا أنا اتأكدت انها فعلا تقليد...سألت الموظف قولتللو دي نفسها ماركة باث آند بودي ووركس؟
قاللي انو ايوا بس الوكيل يختلف...باث آند بودي بريطانية و كارميل صيني
ما أدري ليه دا التلاعب...مو كفاية اللي صار بمحل نكتار؟
رغم اني ما أحبها وما فرقت معايا اذا اتقفلت أو لأه...بس الحسد اللي صار والتلاعب وكل وكيل يقول انو محلو هوا الأصلي...ودخلونا بتفاهات اللوقو اذا فراشة كاملة أو نص فراشة
اش استفادوا؟ أغلب الناس سحبوا ع المحلين لأنهم ماهم عارفين يصدقوا مين ويكدبوا مين!
قبل ما أكتب البوست حبيت أتأكد أكثر...سألت زميلتي عن المنتجات...الا تقوللي أبدا مو كويسة والريحة ماتثبت ع طول تروح بأول ربع ساعة...وانو ترطيبها مو قد كدا
بحثت في النت عن أصل دا المحل كارميل...مااالقيت له أي أصل...ولا أي معلومة...شككوني انو محد سمع فيه الا أنا
المنتج الوحيد اللي لفت انتباهي في المحل...لأني عمري ماشوفتو بمحل باث آند بودي طلع المنتج الوحيد اللي صناعتو أميركية
عبارة عن ليفة طبيعية...فيها كل المكونات اللي تحتاجيها...يعني بس تبلليها بالمويا وتستخدميها ع طول ...
وكل ليفة تكفيكي لـ 20 استخدام أو أكثر.
اللي ع اليمين خاصة بالأقدام...برائحة المنت أو النعناع...تعمل تنظيف وتقشير ومساج وترطيب زي ماهو مكتوب عليها
مكوناتها: جليسرين - زيت الزيتون - زبدة الشيا - أوكاليبتوس أو الكافور
ليفة الأقدام مافي منها الا نوع واحد...أما ليفة الجسم في أكثر من نوع واللي اخترتها باللافندر للاسترخاء
اللي ع اليسار هيا ليفة الجسم...باللافندر...تنظف ... وتقشر ...تعمل مساج ...ترطب ...
ومن مكوناتها : اللافندر - وزبدة الشيا - و فايتامين E
وفي نوع لونو أزرق مخصص للرجال...
هنا سعرها...55 ريال...
ولاحظوا انو مكتوب made in USA
صناعتها أميركية
بس أجربها ان شاء الله...و أقدر أحكم عليها و ع نتائجها
راح أكتب لكم ريفيو عنها باذن الله
أشوفكم ع خير ان شاء الله
فكرة الليفة مررة حلوة
ردحذفخصوصا لوحدة كسولة زيي :$
الليفة ررروعه😃ليفة الكسالى
ردحذفههههههههههههه
ردحذفمن جد تنفع للناس الكسولين
أنا الصراحة فكرت فيها انو حتنفعني لما أكون مستعجلة
ايوه فعلا انا شفته في رد سي مول.. وكانت بتمشي عليه واشتري بس انتبهت لموضوع كراميل هذا وخرجت ، حتى زوجي استغرب قلت له شكله تقليد بأبحث عنه بعدين اشتري
ردحذفحسبي الله على ابليسهم حركات بايخ
بجد أصلا بحياتي ما سمعت عن كراميل الا عندنا في السعودية
حذفالا حبيبتي فين فروع باث اند بودي بجده لانو اللي كان بالعرب قفل ؟؟
ردحذفواحترت وين اروح مافيه الا الصيرفي وحراء؟؟ والا فيه غيرهم
الله يسعدك
بكتب لكم كماان شي مهم ونصيحة بنفس الوقت عشان تقدروا تفرقوا بين المنتج الاصلي والمنتج التقليدي هي علامة وهذي العلامة تتوفر بكل شي سواء اكل او لبس او تجميل تقدري فيها تفرقي بين المنتجين ومستحيل المنتج التقليدي يضعها لانه بتندفع فيها فلوس هذي هي العلامة ® لو شفتيها يعني اصلي لو لا يعني مقلللد
ردحذفانا جربت حق كراميل بالعكس تلاقو تركيز العطر فيه اعلى من باث اند بادي ووركس
ردحذفو حتى سألت عن انها صينيه و قالو لا بس العلبه لكن المنتج امريكي
صح كلامك باث اند بدي كراميل ريحته تجلس اكتر من باث اند بودي وركس!! و كمان ارخص
حذفانا اليوم اشتريت منه ..ريحته الصراحة اقوى و قررت لو في منتج نفسه في باث اند بودي وركس حشتري من كاراميل
ردحذفكراميل باث اند بودّي احسن من بودّي وركس بكتير وانا مجرب منو واشتريت من محل الاندلس مول وكان تعملهم كان جدا روعه يعني موظفين كراميل احسن من وركس بكتير
ردحذفالليفتين تجنننننن
ردحذفحق الجسم وحق الاقدام
حق الجسم ممتازه كتقشير شهري
بس ابدا مو استخدام يومي قويه عالجسم
واللي بشرتها حساسه لاتاخدها ابدا ماتنفعلها
حق الاقدام انا اخد منها ٢ كل مره وحده للقدم ووحده لليد
استخدامها لليد والاظافر روووعه
انصح فيها مررره