منتجات عناية ما أستغني عنها

 

صباح الخير...

 

حبيت أعمل بوست يكون خاص فيا...وأشارككم فيه مجموعة أشياء أعتبرها من مفضلاتي الدائمة...اللي أستخدمها باستمرار حتى لو غيرت وجربت دايما أرجعلها...صارت أساسيات عندي...

دا البوست حيكون خاص بمنتجات العناية...وحيكون في بوست ثاني ان شاء الله خاص بالميك أب

 

 

 

 

في البداية احترت مرا أيا منتجات أختار...واللي فعلا أنا مستمرة عليهم كأقل شي سنتين...لقيت مرا كثير وحاولت قد ما أقدر اني أختار مجموعة بسيطة منهم واللي ممكن تكون متوفرة بسهولة...

 

 

 

في أحلى منهم.؟..التشقير حبيب البنات...واللي بدونو حواجبنا تصير شنبات لووووول

خبرتي طويلة في التشقير...وكل مرا يطلع لنا نوع مشقر جديد وانو مايخللي الشعر أصفر ويخفيه...أتهور و أجربو و أرجع لمجموعتي حبيبتي...

أهم شي انو الصبغة يكون لونها بني متوسط عشان تتحكمي بالدرجة...اذا خليتيها شويا حيكون لون الحواجب بني طبيعي حلو...وكل ما طولت حيغمق اللون أكثر...حتى مع الشعر الأسود المفروض تكون الحواجب بنية...

 

 

 

معالج الشعر بوناويل...جربتو لأول مرا من أكثر من خمسة سنوات...وحسيتو فعلا تريتمنت...أول ما أحس شعري بدأ يخرب ع طول أشتريه و أستخدمو وهوا يقوم بالواجب...ريحتو حلوة ويعطي لمعة للشعر من أول استخدام...أهم شي انو ما يوصل لفروة الراس زي كل أنواع البلسم والتريتمنت

 

 

 

كريم هيمالايا...أتوقع كلكم صرتوا تعرفوا قد ايه أنا أحب دا الكريم...و مو بس حبيبي أنا...حتى أخواتي أدمنوه...

أنا و أخواتي اذا وحدة فينا جربت شي وعجبها لازم البقية يشتروا زيها هههههههه عشان كدا أغلب أشياءنا تتشابه

 

 

زبدة الجسم من بودي شوب...بس دا النوع اللي حلو ريحتو حلوة وترطيبو حلو...ريحة الرازبيري فواحة وتطول...

باقي الأنواع ما حبيتها تسمر وتجفف البشرة مرا

 

 

غارنييه...نصحتني فيها اخصائية بشرة...و لأول مرا أخصائية تنصح بشي من الدرق ستور...وفعلا نصيحتها كانت بمحلها

بالذات الكريم ادمااااان...الكريم كانت الميك أب آرتيست حنان نجاده دايما تنصح فيه وتقول انو سر من أسرارها وانو تقدري تستخدميه كبيس للميك أب...في البداية استخدمت الموف اللي اتكلمت عنو حنان...بس لما جربت دا الأخضر وكمان الأبيض لاحظت انو مافي فرق بينهم...

أستخدمو كترطيب لوحدو...أو قبل الميك أب أرطب وجهي فيه و أسيبو يجف...وبعد دقيقتين أكمل...

 

 

 

كريم اليد والأظافر من فازلين...يدخل في تركيبتو الكيراتين...اللي هوا عنصر أساسي في الأظافر...وفعلا لما أستخدمو أحس اظافري تصير أقوى وفيها لمعة حلوة...دايما موجود بشنطتي لأنو حجمو صغير...

 

لابيللو...أعاني من الجفاف في الشتا...وتجاربي فااااشلة مع مرطبات ومعالجات الشفايف...وكل مرا اقول قديمك نديمك و أرجع للابيللو...للآن مالقيت أحسن منو...الا ايفين كمعالج فقط... وراح أكتب عنو ببوست ثاني ان شاء الله...

 

 

 

سكرب الأقدام من بودي شوب...دايما أقول اني أكره بودي شوب بس اكتشفت انو في بعض المنتجات حلوة...بدون مبالغة دا السكرب أفضل سكرب خاص بالأقدام...صح انو قوي...بس حبيباتو كثيرة أحسو يسكرب من قلب

 

السكرب الثاني سالي هانسون...مرا حلو...عنيف هههههه أقوى من تبع بودي شوب...أستخدموبفترات متباعدة...وغالبا تكون بوقت البوديكير...

 

شايفين أحجامهم صغيرة لكنهم مرا اقتصاديين...بالذات تبع بودي شوب حتتفاجوا انو شويا منو تكفي

 

 

ليفة بودي شوب اللي مافي بنت مو عندها...شايفين الليفة الثانية اللي جنبها البيضا...دي خاصة للوجه من بودي شوب...تنظف البشرة بعمق وتشيل القشور

 

 

 دي القطع الصغيرة...كأنها منشفة بس فيها شوية خشونة...تستخدميها مع الميلك (الحليب) المنظف وتدعكي فيها بشرتكي بحركات دائرية...أو تستخدميها مع الغسول وتكون مبلولة وكمان تنظفي فيها...تنظيفها عميق خاصة المسام ...من بودي شوب

 

 

يخوف مو ههههههههه...نفس اللي يستخدموه في السبا لما يعملوا ماسك للوجه...مرا مريح وعملي...أخدتهم 100 حبة بريالين بس ...موجودة بمحلات تجهيز الصالونات...

 

 

آخر شي...دا الشي الجميييييل...سكرب وزبدة من بودي آند سول...جابتو ليا أول مرا أختي...وقالتلي جربيهم والله غير عن أي سكرب و أي زبدة...تحسي نفسك حرير وتحبي نفسك هههههههه...

ومرا كنت مسافرة الرياض و أرتب أغراضي وشوفتهم...وفكرت أجربهم...و أول شي جا ببالي كلامها لما تقوللي راح تحبي نفسك...

بس للأسف انو المحل مو موجود الا بجده...اللي تروح تاخد كمية عشان ماتندم زيي...أنا ع طول وصيت أختي تجيبلي منهم كمية وترسلها ليا...

 

وبكدا خلص البوست...

 

في شي منهم جربتوه ؟

أتمنى تشاركوني بالمنتجات الأساسية عندكم ...

 

أشوفكم ببوست ثاني باذن الله