ابتسامة وثقة وشوية ميك أب

 

صباح الخير...وحشني التدوين...لما يكون في أكثر من موضوع ببالي أتكاسل أكتب شي...

 

من خلال الانستغرام...لاحظت انو مشكلة أغلب البنات هي الثقة...وأوقات الاحباط...حسيت انو في أشياء مرا سهلة بس حاسين بصعوبتها

لما أنزل ستايل معين...ألاقي تعليقاتك...زي أحب دي القطعة بس ماتناسبني...أنا طويلة أنا قصيرة أنا نحيفة أنا مليانة

مافي شي اسمو مايناسبني...تقدري تلبسي كل اللي نفسك فيه بس بالطريقة المناسبة

نفس حكاية الألوان...كل الألوان تناسب بس الاختلاف في اختيار الدرجة الصحيحة...

 

الثقة هي الجمال الحقيقي...مهما كنتي جميلة...الناس ماحيشوفوكي حلوة الا اذا انتي حسيتي بدا الشي...

أنا كيف شايفة نفسي...الناس حيشوفوني...طبعا مو بالطريقة اللي نشوفها ببعض البنات...غرور وبكل مجلس أنا وأنا وأنا

 

ممكن لو قولت حبي نفسك...حتقولوا كلام مثاليات وشبعنا منو...بس هوا صحيح

عيشي في سلام مع نفسك...اتصالحي معاها...صدقيني حترتاحي كثير...

 

أكثر شي يقهرني...لما أشوف بنت مليانة تجلس تتريق ع نفسها وتضحك الناس...في الجمعات لما تاكل لازم تعلق ع نفسها...واذا اتحركت كمان تعلق ع نفسها...الين ماالتصق في ذهننا انو المليانات دمهم خفيف...كأننا نواسيهم...انو يلا ع الأقل دمكم خفيف...

تلاقي البنت تضحك وتهرج...وهي في قرارة نفسها محرجة...لما تروح البيت بدل ماترجع مبسوطة وتحط راسها ع المخدة وهي متصالحة مع نفسها وتنام...تروح متضايقة وتكره نفسها وتقرر تبدأ دايت...ممكن تكتئب الاسبوع كلو ع حس دي الخرجة اللي خرجتها ع أساس انها تغير جو وتنبسط...

 

نفس الشي بالنسبة لشديدة النحافة والقصيرة والطويلة. والبيضا مرة والسمرا..مافي أحد مرتاح...طيب ألين متى؟

 

شوفي الجانب الحلو في نفسك...أكيد حتلاقي كل مافيكي حلو...انتي حترتاحي وحتعيشي مبسوطة...

أعرف وحدة مرا مليانة هي وبنتها...بس ماشاء الله ربي يحميهم..كمية أناقة واهتمام وثقة ورزانة...شوفتها بمناسبة كانت ملفتة بهدوءها وثقتها وأناقتها...ولا أرشق وحدة تجي جنبها شي

 

لا تلومي الناس في نظرتهم لكي...انتي فين تحطي نفسك حتلاقي الناس يحطوكي بنفس المكانة

 

اختاري لنفسك المكانة اللي تليق فيكي...واللي ترضيها لنفسك

 

دايما أفكر انو ليه دا الشي بس في مجتمعنا...رغم اني أكره المقارنة بين العرب والأجانب والنظرة للأجانب ع انهم الأفضل ودايما نقاشي مع زميلاتي وقريباتي عن دي القضية ههههه...بس انو الأجانب فيهم ثقة فضيعة

ممكن لأننا مجتمع يعشق النقد لمجرد النقد...ماصرنا ناخد الحياة بسلاسة وسهولة...زياراتنا قلت...اجتماعاتنا العائلية تتعد ع الأصابع...حضور المناسبات صار أكبر هم...لأن حياتنا صارت محصورة في المظهر صرنا نحاول نتجنب النقد والجلد من الآخرين...أيام زمان كانوا الجيران يزوروا بعض الضحى والعصرية ولايفكروا اش يلبسوا وحياتهم أبسط مننا بكثير وعايشين ومبسوطين

 

مشكلتنا عدم تقبلنا لأنفسنا وللآخرين...

صارت قيمة الشخص باللي يلبسو...الفستان هو اللي يلبسنا مو نحنا اللي نلبسو...

 

صارت جمعاتنا منافسة قوية لعرض الماركات...يعني البنت تشوف قطعة ذوق وحلوة بس رخيصة وعاجبتها تروح تشتري قطعة عادية بس عشان اللوقو تبع الماركة...أنا مني ضد الماركات...أنا ضد انو أشغلنا نفسنا فيها ...باختصار وبالفم المليان أنا ضد الهياااااااط...

 

مجتمعنا حياتنا في المدرسة في الجامعة في الدوام...حتى لما دخلنا مواقع التواصل الاجتماعي عشان نغير جو ونعيش واقع افتراضي...لقينا الهياط قدامنا...هل يعقل انو بلوقر تحط موضوع طويل عريض عشان اشترت شنطة؟؟؟ طيب أنا اش حستفيد؟؟؟

 

الحياة حلوة...الحياة أكبر من هالات...أكبر من وزن زايد...أكبر من آثار حبوب...عيشوها...

حاولي تعالجيها...واهتمي بنفسك...بس اذا ماصابت معاكي لاتوقفي حياتك عشانها...لاتخللي دي المشكلة هي شغلك الشاغل وهي قضيتكي في الحياة...

في بنات...يروحوا يشتروا قطعة أصغر من مقاسهم كثير...وتقول لما أنحف ألبسها! طيب ( لما ) متى تجي؟

الموضة سريعة...ممكن تعدي فترة طويلة والقطعة قدمت...وانتي مالبستيها...لو اتقبلتي نفسك واشتريتي قطعة ع مقاسك...كنتي لبستيها وانبسطتي...كدا انتي متصالحة مع نفسك...

ما أقول انو لاتنحفي...لأ...انحفي...بس من هنا لليوم اللي تصيري في نحيفة عيشي حياتك...

 

بالعكس...في أوقات نشوف قطعة تجنن ونفسنا نشتريها ونقول خسارا ما تناسبنا ...تناسب وحدة مليانة...

 

 

الابتسامة...مافي أحلى منها...هي الجمال الحقيقي...

لو دققتوا فيها...عادية...بس ابتسامتها و ثقتها هي سبب جمالها...

 

 

لو نحنا مانتصور زيها...لازم  بوز الدك ليبس أو شفايف البطة هههههه...وميك أب واستشوار

لكن شوفوا نظافة الصورا والحيوية والثقة اللي فيها...أول مانشوفها حنقول جميلة...لكن دققوا في حواجبها...شفتها العلوية...لثتها...الباقز اللي تحت عيونها.

 

 

جميييلة...ابتسامتها مريحة...كمية ثقة وتصالح مع النفس...

 

في مثل عندنا يقول...لاقيني ولا تغديني

 

كم موضة انتهت وانتي مالبستي منها شي لأنها ماتناسب المليانات أو النحاف أو القصار

محد حيرجع الموضة لخاطر عيونك...ولا حتقدري ترجعي الزمن عشان تلبسي وتتهني...

 

كلو كوم وكلمة دا اللون مايناسب عمرها...أو دي القطعة ما تناسب عمرها...

أنا معاكم انو في أشياء أوفر...بس ع أي أساس نقيد الآخرين.؟..في بنات نفسي أقولهم اذا انتي مقيدة حياتك بليز خللي غيرك يعيش طالما انها ماضرت غيرها ولا اتعدت الحدود الشرعية

 

هل في آية قرآنية أو حكم شرعي يقول انو اللي عمرها 50 سنة ماتلبس بينك؟؟؟

 

العمر واحد عيشوه...طالما انو مو عيب ولا حرام ليه لأ.

 

مشكلتنا حطينا أنفسنا في مكان القيّم ع غيرنا...نسينا عيوبنا وأشغلنا أنفسنا بغيرنا

ترا زي ماانتي تنتقدي غيرك...تأكدي انو في المقابل في أحد ينتقدكي

 

الميك أب والملابس...نقدر نتلاعب فيها بخدع تظهرنا بأفضل مظهر

 

دي الخدع حنزلها ع شكل سلسلة بوستات...أتمنى تستمتعوا فيها

 

 

أول شي حتكلم عنو الميك أب

 

في بنات يقولوا ما نحب الميك أب...ويزوروا ويحضروا مناسبات بدون الميك أب...أو انهم فاهمين الجمال والثقة انها بعدم استخدام الميك أب<<< كم مرة قولت ميك أب لووووووووول

 

ترا أجمل الجميلات ماتخرج بدونو

 

عارفين ليه؟ لأنو أول ماتقوليلها حطي ميك أب...يجي ببالها دا الشي

 

 

صراحة ما ألومها...لو أنا أقولها اغسلي وجهك وأخرجي لوووووول

 

 

 

 

واذا حبت تعمل انها مو حاطة شي...تكون بدا الشكل...

 

الصورا اللي ع اليسار...لو حجيب بنت عمرها 10 سنوات حتقول انها حاطة ميك أب...

مشكلة البنات اللي مايحبوا الميك أب...أو حاولوا يظهروا بشكل انها مو حاطة شي ع وجهها...يظهروا بدا الشكل...

حواجب مرسومة بشكل مو طبيعي... وروج باهت وبودرة باهتة...

 

الميك أب...من الخدع اللي نتلاعب فيها عشان نظهر بنفس الملامح والتقاسيم بس بشكل أفضل...

ممكن نخفي العيوب...البهتان...ونعطي حياة ونضارة...

 

 

 

 

دا الميك أب الصح...ممكن لو وحدة شافت الصورا اللي ع اليمين قالت واااو بشرتها تجنن بس حاطة كريم مرطب...

لكن شوفوها في الحقيقة ع اليسار...بدون ميك أب

 

الميك أب طبيعي وأعطاها نضارة واشراقة وحيوية جمييييلة...دا اللي أقصدو

 

اذا ماتحبي الميك أب...مو شرط تطلعي ببشرة باهتة ووجه شاحب وتعبان والبشرة متباينة مو صافية ولا موحدة وهالات

 

 

ريانا...من الفنانات اللي لو وحدة تشوفها تقول...ياعيني عليها بسيييطة...بس شوية فاونديشن وخطة آيلاينر وروج بينك

 

بس لو ريانا قالت أنا ماأحب الميك أب...كان شوفتوها بالمنظر اللي ع اليسار

دا اللي يعجبني في الأجانب...قاعدتهم...أنا أحب نفسي و أتقبلها بس مايمنع من شوية لمسات جمالية...لاحظوا انو أنف ريانا زي ماهوا...ريانا تقدر تعمل ستمية عملية تجميل لأنفها...لكنها انسانة متصالحة مع نفسها...كل اللي عملتو شوية تلاعب بالميك أب

 

 

لاحظتوا الفرق!

 

 

كاترين...من الفنانات اللي يتوقعوا الأغلبية انها ماتحتاج الا روج وشوية بلاشر وكحل...

لكنها غير كدا...في مقابلة سألتها المذيعة انو كيف تحافظي ع جمالك

جاوبتها انو خلف دا المظهر الجميل تيم أو فريق عمل مختص كاااامل...وانو تجهيزها ياخد ساعات

 

نفس الشي بالنسبة لجينيفر لوبيز...الآرتيست تبعها يقول انو قبل أي ظهور لها ع الشاشة ياخد تجهيزها منو

مالا يقل عن أربعة ساعات متواصلة

 

مرا شوفت برنامج استضافوا فيه أم تتكلم انو بنتها المراهقة أصيبت بالهوس بسبب الفنانات...

وبسبب دي البنت بعض الفنانات رضيوا يتصوروا بدون أي ميك أب ولا فوتوشوب

وكانت الصور تظهر الترهل والسترتش ماركس والحبوب والسيلوليت

 

راح أعرضلكم مجموعة صور...بس عشان تعرفوا انو اللي نشوفهم ع الشاشات مو بالصورة اللي نتوقعها...

نحنا بنظافتنا واسلامنا في أسوأ حالاتنا أجمل وأرتب منهم كثييييير....

 

اعتبروها رحلة لاستعادة الثقة بالنفس...

 

 

 

 

 

 

 

 

 

 

 

 

 

وغيرهم كثير كثير...غير الصور اللي أظهرت السيلوليت والسترتش ماركس...غير الصور اللي التقطوها لهم أثناء حضورهم للمهرجانات العالمية وكان شعر يدهم ورجلهم طويل وحتى الآرم بت...أو الابط...

كيف ما يكونوا كدا...وهم لادين يأمرهم بالنظافة...ولا حياة منظمة...كلها سهر وشرب

الحمدلله ع نعمة الاسلام...اللي علمنا النظافة والاهتمام...يكفينا الوضوء ...

 

كفاية تمجيد لهم ولجمالهم وانتقاص لأنفسنا

 

نحنا أجمل.........ولا اش رايكم؟

 

آسفة ع الاطالة...الموضوع ارتجالي...كتبتو ولا حتى راجعتو ولا أعدت قراءتو...عشان ما أعدل بعض الجمل...حبيتو يكون طالع من قلبي...اذا في اخطاء املائية عدوها ياجميلات...