How to choose the perfect foundation...اختيار الأساس المناسب للأندرتون

 

اختيار الفاونديشن المناسب أهم جزء في الميك أب كلو

وتقريبا هي أصعب مرحلة

 

في أشياء تحكمنا في اختيار الفاونديشن المناسب...

التركيبة المناسبة لنوع البشرة – الدرجة المناسبة – نسبة واقي الشمس ( في أنواع فاونديشن يكون فيها نسبة SPF وهي مناسبة للنهار واللي يستخدموا الفاونديشن وقت دوامهم )

اذا عرفتي نوع بشرتكي حتعرفي تختاري التركيبة

واذا عرفتي الأندرتون حتقدري تختاري الدرجة المناسبة

 هنا طريقة معرفة الأندرتون

 

http://shopaholic-90.blogspot.com/2013/12/skin-under-tone.html

 

 

دي طريقة سهلة تساعدكي انك تعرفي نوع بشرتكي

 

 

 اغسلي بشرتكي بدون مبالغة في تنظيفها...اغسليها بالطريقة العادية اللي متعودة عليها...وسيبيها لساعتين ...بعدها غطيها بمنديل واضغطي عليها وامسحي بشويش...وشوفي المنديل...

اذا كان زي أول صورا  ع اليمين( اللون الأزرق يدل ع الدهون ) معنى كدا انو بشرتكي دهنية.

اذا كانت الدهون تتركز في منطقة التي زون ( الجبهة والأنف والدقن ) فبشرتكي مختلطة.

اذا كان المنديل نظيف فهيا عادية.

واذا كان نظيف مع ظهور شوية قشور ع الوجه وتحسي بشرتكي مشدودة فهيا جافة.

 

 

بعد مااتعرفتي ع نوع بشرتكي...حنشوف أنواع الفاونديشن وكل نوع يناسب أيا بشرة...

 

Stick foundation

يناسب البشرة الدهنية وتغطيتو مرا قوية...والميك أب آرتيست ما يفضلوه لأنو يأثر ع البشرة ولازم تكوني حريصة في تنظيفو لأنو يعبي المسام.

 

Pressed powder foundation

كمان يناسب البشرة الدهنية.

Cream foundation

يناسب البشرة العادية والجافة والمختلطة...

 

 

Liquid foundation

يناسب البشرة الجافة...واذا حبيتيه للبشرة المختلطة والدهنية ممكن تثبتيه بالباودر سواء compact powder ( المضغوطة ) أو Loose powder  ( السايبة ).

التركيبة المناسبة لنوع بشرتكي

اذا كانت بشرتكي دهنية ابحثي عن دي الكلمات ع الفاونديشن:

"oil-free," "oil-control"  "mattifying"

يعني انو خالي من الزيت...ويتحكم في الدهون

واذا كانت بشرتكي جافة...فانتي في الأغلب حتحتاجي فاونديشن بنسبة ترطيب...واللي يدخل في تركيبها الجليسرين...فابحثي عن دي الكلمات ع العلبة:

"hydrating" "moisture-rich"

اما اذا كانت بشرتكي مختلطة...فلازم تحددي هل المناطق الدهنية أكثر من الجافة أو العكس...

البشرة الحساسة...الأفضل لها أنواع المينيرالز أو المعادن...واللي غالبا تكون مناسبة لكل أنواع البشرة

 

اختيار الدرجة المناسبة

الحمدلله دحين بعد ماصارت أغلب المحلات نسائية نقدر ناخد راحتنا في الاختيار والتجربة

 

 

 

أفضل مكان لتجربة اللون المناسب للبشرة هو الفك...بعكس المعتقد السائد انو ع معصم اليد.

لأنو منطقة الفك تساعدكي انك تختاري الدرجة المناسبة للوجه والرقبة...

من الأفضل قبل ماتروحي تشتري...تعملي سكرب للبشرة وتنظفيها وترطبيها...عشان تقدري تحكمي مزبوط ع الفاونديشن...

لأنو وقت استخدامنا للفاونديشن نكون عاملين دي الخطوات ومهيئين البشرة للميك أب...ومع التقشير شي طبيعي يبين اللون الحقيقي لبشرتنا الشي اللي يساعدنا ع اختيار الدرجة المناسبة

وقت تجربة الفاونديشن...حاولي تجربيه قريب من باب المحل...أو خطوة خارج المحل عشان تكوني في اضاءة طبيعية تساعدكي ع الحكم ع الفاونديشن...دايما اضاءة المحلات تكون قوية ودا الشي من الأسباب اللي تخلينا نختار خطأ.

عشان تختاري اللون المناسب لازم تكوني عارفة الأندر تون لبشرتكي

البشرة الباردة ( Cool  )...تناسبها الدرجات اللي ع وردي.

البشرة المحايدة (neutral  ) ...تناسبها البيجيات اللي ع أصفر.

البشرة الدافئة ) warm ) ...تناسبها البيجيات المايلة ع أصفر أو أورانج.

أفضل ماركة ممكن تلاقوا فيها درجات البيج ع أصفر هي:

MUFE ميك أب فور ايفر و بورجوا تحديدا فاونديشن هيلثي ميكس.

دا بالنسبة للفاونديشن...

نجي لـ LIP STICK أو الأرواج...

أكبر معضلة عند البنات أعتقد انها الروج الأحمر...ما أحب البنت اللي تقيد نفسها وتحرم نفسها من الألوان بحجة انها ماتناسبها...

 

شوفوا الصورة...بشرتها باردة وتلاحظوا القاعدة اللونية أزرق...كأنو في لون أزرق بسيط مع الأحمر

 

هنا كمان تلاحظوا نفس الدرجة لأنو كلهم لهم نفس الأندرتون الباردة.

 

 

 

كمان أحمر...بس اختاروا أحمر بقاعدة لونية أورانج لأنو بشرتهم دافئة

 

 

 

دي القاعدة طبقوها ع كل ألوان الأرواج والمناكير...

اذا عندك روج أحمر بدرجة ماتناسبكي...حاولي تدمجيه مع مسحة بسيطة من روج أورانج أو مشمشي أو حتى شادو مشمشي وحيزبط معاكي باذن الله...دا لو كانت بشرتكي دافئة أو محايدة.

 

واذا حصل العكس... وكانت بشرتكي باردة...ادمجيه مع شادو بلون الموف أو الأزرق وحيزبط معاكي...

أي شي قاعدتو اللونية أزرق فهو مناسب للبشرة الباردة.

وأي شي قاعدتو اللونية أورانج أو دهبي فهو مناسب للبشرة الدافئة والمحايدة

دا بشكل مبسط...حنعرف تفاصيل اللبس والاكسسوار وبالصور باذن الله في البوست الجاي.

 

استفدتوا من البوست؟ حسيتوا انو الموضوع سهل؟