مساءكم خير
أوقات تشوفي تي شيرت حلو ع أختك...بس لما تلبسيه مايزبط عليكي...أو حصل معانا انو يعجبنا لون روج أو حتى كحل ملون ع أخواتنا أو صاحباتنا...حلو عليهم بس لما نجربوا ما يعجبنا...و حتى العدسات الملونة والمناكير...
اش السبب؟
يمكن كلكم مر عليكم في برامج الفاشن والميك أب...انو الستايلست تجيب
قطع قماش ملونة وتلفها ع أكتاف العارضة أو اللي تبغى تلبسها...عشان توريها
الألوان المناسبة لها...
اش هوا دا التكنيك؟ اش اسمو ؟ وكيف نستخدموا بحياتنا كالستايلست
المختصين في الموضة و الميك أب آرتيست؟
كل دي الأشياء حنعرفها باذن الله اليوم...
كنت لما أشوفهم...أتحمس أعرف أكثر عن دا التكنيك...وصرت مرا مهتمة فيه
وقرأت عنو كثير كثير في المواقع الأجنبية ومقالات ودروس لأخصائيين في دا المجال...
اليوم راح أحاول أكتب لكم الخلاصة وبخطوات سهلة تمكنكم انكم تختاروا
لنفسكم الألوان والميك أب بدون مساعدة أحد وبطريقة احترافية وتظهروا بأفضل مظهر...
أوقات نلبس لون يعطينا توهج وينور بشرتنا ونحس أنفسنا مرتاحين فيه و
بأفضل حالاتنا...وبلغتنا العامية البسيطة نقول اللون يعكس ع بشرتي.
وفي ألوان ماتناسبنا أبدا تبهتنا وتخللي بشرتنا شاحبة وتعبانة.
دا كلو يرجع لشي اسمو Skin UnderTone...اش هوا الأندرتون؟
هو اللون اللي يكون تحت بشرتنا الخارجية الرقيقة مباشرة...هو اللون
الحقيقي لنا...واللي يتحكم بانو أي شي نلبسو من لبس أو نستخدمو من ميك أب يناسبنا
أو لأه...الأندر تون مايتغير أبدا لا بتأثير شمس و لا أي عوامل خارجية...بعكس
بشرتنا اللي تسمر ويتغير لونها بسبب العوامل الخارجية.
ليه معرفة الأندرتون الخاص فينا مهمة؟
اش اللي حيصيراذا اخترنا اللون المناسب للأندرتون سواء ملابس أو ميك أب؟
حتبين بشرتنا مضيئة ومتوهجة وفيها نضارة
عيوننا حيكون فيها لمعة وصفاء
شعرنا حيعكس الاضاءة وحيكون في لمعة
حنسمع تعليقات حلوة زي انتي اليوم حليانة...بشرتكي صافية...
وفي المقابل اذا صار واخترنا اللون الغير مناسب؟
حتبين بشرتنا تعبانة ومرهقة
حيكون في زي الظلال ع عيوننا وهالات سوداء
حتى الأسنان حيعكس عليها لون أصفر
حنسمع تعليقلت زي: اش فيكي تعبانة؟...شكلك سهرانة...ما نومتي كويس؟
عندنا ثلاثة تصنيفات للأندرتون... الدافئة ( warm ) والباردة ( cool ) والمتوسطة بين الباردة والدافئة (neutral ).
كيف تعرفي أندرتون بشرتكي؟
حشرحها لكم بطريقة سهلة
ومبسطة...
لاحظي لون أوردة معصمك... وشوفي تتطابق مع أيا صورا من الصور التالية:
اذا كانت الأوردة لونها أزرق أو بنفسجي فانتي من أصحاب البشرة الباردة (cool )
وعادة بشرتكي فيها سحنة لون وردي أو احمرار
اذا كانت الأوردة خضراء أو زيتية فانتي من أصحاب البشرة الدافئة( warm)
وعادة بشرتكي حيكون يغلب عليها اللون الأصفر أو الدهبي
أخيرا...اذا كانت الأوردة لونها أزرق مخضر...يعني اللون مو أزرق صريح ولا هوا أخضر صريح ...اذا كنتي محتارة في تحديد لونهم فانتي من أصحاب البشرة المحايدة...ولون بشرتكي يكون كمان ين وبين...لا هو الوردي ولا الأصفر الدهبي
أصحاب دي البشرة يعتبروا محظوظين...ماعدا في الفاونديشن أو الأساس فهما يتعبوا كثييير في اختيار اللون المناسب...وممكن تكون أكثر تجاربهم في اختيار اللون المناسب لكريم الأساس فاشلة...ليه؟
دا الشي حنعرفوا في البوست الجاي ان شاء الله.
دي الطريقة الأأكد والأسهل...واللي تقريبا يعتمدوها المختصين في المظهر والميك أب...
في طريقة ثانية بس انها أصعب بس يبغالها احترافية ...حذكرها بس للمعرفة...اسمها Pony Tail Test...اختبار ذيل الحصان...
وهي انك تنظفي وجهك كويس...وترفعي شعرك كلو بوني تيل وتشديه ع ورا...تجيبي منشفة بيضا وتوقفي بمكان في اضاءة معتدلة قدام مرايا...
حيظهر لون ع بشرتكي...
اذا كان اللون أصفر فانتي من أصحاب البشرة الدافئة...واذا كان اللون وردي فانتي من أصحاب البشرة الباردة...
بعد ماعرفتي الأندر تون تبع بشرتكي...تقدري تختاري لون الفاونديشن بسهولة وتبدعي في ألوان الأرواج والبلاشرات...وتلبسي اللون اللي يخلي بشرتكي مشرقة...استمتعي...ماعاد في شي اسمو دا اللون ما أحبو أو مايناسبني أو يسمرني ويبهتني...
ومو بس كدا...الأندرتون يتحكم حتى في لون الشعر والصبغات اللي تناسبنا...
اذا عجبكم الموضوع...راح أنزلكم سلسلة بوستس باذن الله...وحنتكلم فيها عن اختيار الفاونديشن المناسب و الألوان المناسبة للبس وحتى الاكسسوار وفقا للأندرتون تبع بشرتنا...
بس خبروني...أنا في انتظاركم....
اكككيد نبغى ✋
ردحذفلاني الصراحة اتعب في دا الموضوع مرة
ننتظر جديدك اكيد :)
ردحذفرووووعه ونستنى السلسلة
ردحذفياليت والله تبعا لوصفك انا من البشرة المحايدة ونفسي اعرف اكثر عنها
ردحذفيعطيك العافيه مجهود عظيم تستحقين عليه الشكر ...
ردحذفوأسلوبك المختصر المفيد يشوووق ....
طيب اذا كانت خضراء وبنفسجية كيف تكون اخولت :( عيونى وانا اطالع مع انوة انا بيضاء بس وجهى مصفر
ردحذفشكرا على ها النصائح
ردحذفانا احس ان كل الالوان تليق عليا بس الوردى والموف يخلينى احلى والازرق مو بحلو عليا ابدا وعمرى ما جبت فاونديشن وعجبنى
ردحذف