موضة الأطفال لربيع وصيف ٢٠١٥

صباح الخير

والله عارفة اني مقصرة مرا في التدوين..بس ان شاء الله راح أرجع أكتب هنا و أعوضكم

كتبت كثير عن الموضة في كل النواحي...بس أحس الأطفال ما أعطيتهم حقهم

حتكلم اليوم ان شاء الله عن موضة ربيع وصيف 2015 للأطفال

و ان شاء الله تستفيدوا

قبل كل شي عندي نصيحة صغيرة بالنسبة للوكات الأطفال

الطفل يضل طفل لا تقتلوا طفولتهم بأنكم تلبسوهم بطريقة تحسسنا انهم كبار

صرنا نشوف البنات الصغار كاشخين و كأنهم حريم بأحجام صغيرة

و الأولاد كأنهم ميني رجال

و من وجهة نظري أشوف انو التطقيم بشكل معقول يضل موضة كل المواسم و كل السنوات للأطفال بالذات البنات

أوكي

يلا نبدأ بالموضة بشكل عام

الألوان للبنات

المشمش مع الأبيض الكريمي

الوردي بكل الدرجات طبعا هو موضة ماتتغير

الأزرق

الأسود مع النيون اللي هي الألوان الفسفورية الصارخة

الخامات

الدانتيل

والتول

ودخول الترتر كتفاصيل

والقطن

الألوان للأولاد

الألوان الغامقة مع دخول لون فاتح صارخ

الأزرق الفاتح و الكحلي الغامق

البنفسجي

الأسود

موضة الأطفال مجالها وااااسع لكن راح أقتصر الحديث على بعض الأشياء وراح يكون النصيب الأكبر للبنات

تنانير و فساتين التوتو...أو التول...راجعة و بقوة

دا التريند...سموه الحديقة...لأنو يكون فيه تفاصيل بارزة مستوحاة من الطبيعة

زي قصاصات الأوراق و الورود

القطع السبورت أو الرياضية مع اضافة تفاصيل ستايليش...زي الترتر و الدانتيل أو تفاصيل لميعة

الطبعات اللي تكون مكررة بنفس الشكل على كامل القطعة

زي البنطلون اللي ع اليسار

ودا التريند حتى بملابس الأولاد

..........

ستايل الهيبي...اما يكون بكامل القطع...أو بإضافة أكسسوار فقط

زي هنا في أكسسوار و تسريحة الشعر

أو هنا

ميكي ماوس و ميني ماوس راجعين و بقوة

طبعة البطيخ و الأناناس من أكثر الطبعات انتشار للموسم الحالي سواء للبنات أو الأولاد

هنا البنوتة لبست سبور مع التول


ننتقل للأولاد

الباترند أو القطع بطبعات مكررة أبرز موضة لدا الموسم
وإذا حبيتوها موجودة بطبعات مرا حلوة في اتش آند ام

كمان الأنيمل برينتد
أو طبعات الحيوانات

شايفين البساطة

ودخول اللون الفاتح مع الأزرق

هنا اللون الأسود مع لون فاتح

زي ما ذكرت بداية البوست

و أخيراً أرجع أقول انو انتي حرة نفسك محد يلزمك تتبعي الموضة

هي مجرد خطوط و توجهات اذا ناسبتك ممكن تتبعيها

واذا ما ناسبتك تقدري تاخدي منها الشي اللي يناسب ذوق و تطوعيه بطريقتك الخاصة

Benefit Products

 

 

السلام عليكم

 

بوست اليوم حتكلم فيه عن رأيي في بعض منتجات بينيفت

 

 

نبذة بسيطة عن الماركة

 

هي ماركة أميركية...لأختين توأم اسمهم جين و جاين فورد.

ولدوا في الهند و انتقلوا لأميركا و اشتغلوا عارضات.

 

عام 1976 فتحوا محل صغير و سموه فيس بليس...و كانوا يبيعوا فيه بلاشر و تينت الشفايف و سموه روز تينت...و كان من أشهر منتجاتهم و اللي صار اسمو الآن بين تينت و اللي انباع منو للآن عشرة مليون عبوة.

 

عام 1989 غيروا اسم البوتيك و صار اسمو بينيفت...و اللي معناه الفائدة.

 

و عام 1991 فتحوا أول محل رسمي في أميركا...و في عام 1997 بدأوا الانتشار في العالم و افتتحوا أول محل برا أميركا و كان في لندن.

 

فكرة الماركة ع حسب كلام جين و جاين انها تعتمد ع الاصلاح السريع المؤقت.

 

و يمكن دا السبب اللي خلى المنتجات مو بجودة عالية.

 

 

بشكل عام ما أميل لمنتجات بينيفت أبدا...الملفت فيها تعليبها فقط...و تنفع كديكور ع التسريحة...لكن جودة سيئة للأسف

 

حتى لما أوقف عند الماركة أجرب و أجرب ع طول يجي ببالي انو ماركات الدرق ستور الموجودة بسنتربوينت أفضل بكثير

 

الله يخليكم لما تبغوا تشتروا شي جربوه بأنفسكم في المحل

اش فايدة التيستر اذا كنتي راح تعتمدي ع تجارب غيرك؟

 

خاصة انو كثروا ( مسوقات ) بينيفت!

 

 

 أستثني من منتجاتهم اللي جربتها بلاشر دالاس...حلو ولونو طبيعي
و ماسكارا الحواجب خاصة الدرجة الفاتحة...تفتح الحواجب بطريقة طبيعية

 

 

من اليمين لليسار

 

بودرة الحواجب - هاي بيم - بين تينت - بورفيشينال - باثينا

 

 

زبدة باثينا

 

قوامها زبدة كأنها زبدة الكاكاو من بالمرز...شفافة مالها لون...يعني ما تعمل أي تغطية للعيوب

 

ريحتها معطرة بس العطر القوي اللي كأنو رجالي...اذا كنتي حاطة لوشن معطر ممكن ريحتها تطغى ع ريحة اللوشن و تأثر حتى على عطرك...ريحتها مزعجة و تصدع...ما تناسب البشرة الحساسة بسبب تعطيرها القوي

 مو ثابتة يعني في النهار و مع الحر راح تختفي...أصلا لو مسحتيها بيدك تروح

 

لمعتها مو زي لمعة الهايلايتر...تعرفي لما ترطبي جسمك بزبدة...نفس دي اللمعة بالزبط اللي كأنها كريم

 

جربت الزيت منها و كمان مرا سيء

 

 

 

 

 

هاي بيم

 

اضاءة هاي بيم...من أسوأ الاضاءات اللي جربتها...تتكتل و تجف بسرعة و توزيعها صعب...لازم تحطيها نقاط و بسرعة تطبطبي عليها بأصابعك

 

تبين عيوب البشرة و اذا عندك مسام راح تخلي شكلها كارثة

 

 

بين تينت

 

ع أساس انو منتج يعطيك لون أحمر حلو و ثابت و بريحة الورد

 

للأسف فكرة المنتج حلوة...بس التنفيذ سيء

 

لون سيء و ثبات فاشل و نتيجة سيئة

 

بنت أختي اذا بكيت تبغى مناكير...أعطيها التينت و أخليها تلعب فيه هههههههههه

 

 

 

 

 

 

 

بودرة الحواجب مع الشمع

 

لونها حلو و طبيعي...لكن بعد فترة تسبب تساقط للحواجب و قشور

 

 

 

 

بورفيشينال

 

برايمر للمسام...حلو و نتيجتو حلوة...بعد الكلاريسونيك طلعت لي مسام بين حواجبي و ع أعلى خدودي ع الأطراف...أستخدمو بحذر عليها و يعطيني نتيجة مقبولة

 

هو منتج تجميلي مو علاجي...يعني نتيجتو مؤقتة وقت الاستخدام فقط

عيب منتجات تعبئة المسام و الفيلر اللي هي تعبئة الخطوط التجميلية المؤقتة انها تزيد المشكلة و توسع المسام و تخلي الخطوط أعمق

 

 

تجربتي لماسكارا ذي آر ريل موجودة في حسابي ع الانستغرام

 

 

 

 

 

Body washes...غسولات الجسم

 

 

اكتشفت اني أكثر شي جربتو في الحياة هي الشور جل ههههههههه

 

قررت أكتب عن تجاربي...و راح يكون على أكثر من جزء عشان ما يكون البوست طويل

 

و خسااارااا اني قبل أيام رميت تقريبا ستة علب فارغة لشور جل خلصتهم...ما كان ببالي البوست

 

 

في البداية حابة أوضح انو في فرق بين الشور جل و الشور كريم...اتكلمت عنو في حسابي ع الانستغرام sosanita90

في هاش تاق...#سوسانيتا_كير

 

 

 

 

 

 

 

راح أبدأ بشور كريم حليبي نمبر فايف من شانيل

 

صارلي أستخدمو أربعة سنوات

ريحة عطر نمبر فايف صابونية...ريحة نظاااافة

الشور كريم منو نفس العطر بس على أقوى...يثبت في الجسم و تبقى ريحتو في الحمام لفترة طويلة مقارنة بباقي  أنواع الشور جل

عموما أحس انو نمبر فايف يناسب يكون شور أكثر من انو عطر ودا رأيي الشخصي 

التعبئة الزجاج ليميتد أديشن و سعرو تقريبا 422 ريال

التعبئة البلاستيك العادية سعرها 200 وشي

 

 

بما انو بشرتي تميل للجفاف حتلاحظوا أغلب شوراتي كريمية

الشور كريم من اتش آند ام...كل ما أستخدمو أقول يضع سرو في أضعف خلقو ههههههههه

ريحتو نفاثة و أحسو فعلا ينظف البشرة و ما يحسسها و لا يسمرها

سعرو 29 ريال تقريبا و في التخفيض 10 ريال و كميتو كبيييرة زي ما انتو شايفين

350 مل

 

 

 

 

شور جل جونسون

أستخدمو ليا مو لجولي

أحب ريحتو خاصة قبل النوم

لكنو للأسف مع الاستخدام يجفف البشرة و حتى لو استخدمت كريم بعدو برضو ما ينفع

عشان كدا ما أستخدمو بشكل متواصل

سعرو ما أفتكر بس انو رخيص

 

 

شور جل بودي شوب

يجفف لدرجة مرضية

يعني مو جفاف طبيعي...لأه الجفاف اللي تتحسس معاه البشرة و تتشقق تشققات قوية و عميقة و تحتاجي علاج...غير الاحمرار و الحكة و السماااااار

دا بالنسبة ليا...الأفضل تستخدميه بس في المناسبات و بفترات متباعدة

أحب أنانيا...ريحتو مميزة و ترتبط عندي بالشتوية و ثابتة نوعا ما

سعر شور بودي شوب بحدود 30 ريال

اذا غلط قولوا لي

 

 

 

 

الحب الجديد ههههههههه

شور جل زبدة الشيا...من شركة فرنسية بالطلب

طلبت واحد عشان أجربو...لقيت انو ينظف و يطري البشرة و ما يجففها أبدا

يعني ما تحسي انك جالسة تنظفي بشرتك بشي صابوني ممكن يجففها و يزيد مشاكلها

مرراااا حبيتو ...رجعت طلبت منو واحد ثاني و حتى اخواتي طلبوا معايا

سعرو أعتقد 33 و حجمو 200 مل

 

طلبتو من الحساب اللي دايما أطلب منو

 

@mtgr_almaddinah

 

 

 

شور جل من نفس الشركة بس بريحة الورد

امممممم حسيتو عادي زيو زي أي شور جل عادي

المميز فيه ريحتو بس

ناسب أختي لأنو بشرتها مختلطة

بس أنا لأ الصراحة...لأنو بشرتي تحتاج ترطيب

المشكلة اني طلبت منو ثلاثة هههههه

سعرو بحدود 20 ريال وكمان سعتو 200 مل

 

 

 

غسول سيتافيل

 

أستخدمو في الشتوية لأنو بشرتي تجف و تتحسس

طبي و يناسب حتى الأطفال و تقدري تستخدميه حتى للوجه

اذا بشرتك حساسة و تحمر من أي شور جل أنصحك فيه

طبعا مو معطر أبدا

موجود في الصيدليات و سعرو بحدود 70

 

 

 

 

شور جل فازلين

ناااعم ع البشرة و ما يجففها و أحسو يترك بشرتي طرية

في توحيد البشرة مالو أي تأثير بس ع الأقل انو ما يسمرها

 

 

 

 

شور كريم فلورنتينا

أستخدم المجموعة كاملة في البيت

ريحتو باودرية

ريحة هااادية و حالمة

ما أعرف اذا تثبت في الجسم أو لأ

لأني أستخدمو مع المجموعة كاملة ما جربت أستخدمو لوحدو

مافي شي مميز غير ريحتو

سعرو 39 ريال

 

 

 

شور كريم ميد نايت من باث آند بودي ووركس

عموما شور باث آند بودي ووركس أفضلها

ريحتها نفاثة وثابتة و أهم شي ما تجفف و لا تسمر البشرة

ما أفتكر كم سعرو

 

 

أشوفكم ان شاء الله في جزء ثاني

 

Highlighters...الاضاءات

 

 

 

 

 

 

 

 

بوست اليوم حتكلم فيه عن الهايلايتر أو الاضاءة

أنواعها

استخدامها

و تجاربي الشخصية

 

ان شاء الله تستفيدوا

 

الاضاءة هي منتج باودري أو كريمي يعطي لمعة للوجه.

 

فين نستخدم الاضاءة؟

 

نستخدمها في المناطق اللي نبغى نبرزها.

مثلا تحت الحاجب و أعلى الخدود و أعلى الأنف تحديدا على جسر الأنف و أوقات تستخدم ع الجسم خاصة في السهرات

 

الاضاءة أنواع...تعتمد ع نوع البشرة

مثلا البشرة الدهنية يفضل نستخدم لها الاضاءة الباودرية لأنها أكثر ثبات

بينما البشرة الجافة تناسبها الاضاءة الكريمية أكثر لأنو الباودرية راح تبرز القشور اللي فيها بسبب الجفاف

 

اذا بشرتك فيها مسام...اعتمدي الاضاءة الباودرية لأنو الاضاءة الكريمية راح تبرز المسام أكثر

 

و حاولي توزعي الاضاءة بعيدا عن المسام...مثلا لو عندك مسام ع الخدود ابعدي عنها و استخدمي الاضاءة ع عظمة الخد...أو ممكن تكتفي فيها تحت الحواجب و ع الدقن.

 

للإضاءة درجات.

وردي و لؤلؤي أو عاجي و برونز و دهبي و فضي

دايما أفضل تبتعدي عن الاضاءة الوردية لأنو مهما كانت بشرتك فاتحة الا انو لونها يقلب و يبهت و مع الاضاءة الخافتة تبين رمادية

 

 

 

 

 

 

الاضاءات الكريمية

قوامها كأنها كريم أو لوشن

 

ستروب ماك...هو مو اضاءة بس حتكلم عنو لأنو الغرض منو الاضاءة...في منو نوعين نوع كريم و نوع لوشن...أنا جربت الاثنين ما حسيت فرق في النتيجة الشكلية الا انو ثبات اللوشن أكثر.

فكرة الستروب انو تستخدميه كمرطب قبل الفاونديشن...يرطب البشرة و يعطيها لمعة

ع قد الشهرة و المدح الا انو من وجهة نظري الشخصية مايستاهل و أبدا مو عملي

لمعتو لا تذكر...و بمجرد ما تحطي الفاونديشن تختفي و كأنك يا أبو زيد ما غزيت

صرت أخلطو مع الفاونديشن و نفس الشي مالو تأثير وااااااو

 

اضاءة ريفلون سكين لايتس...من أروع و أشهر الاضاءات...طلعت قبل ستروب ماك بسنوات...كميتها ضعف كمية ستروب ماك و سعرها ربع سعر الستروب.

في منها ثلاثة درجات...الوردي و اللؤلؤي و البرونز

انقطعت لسنوات و دحين من سنة تقريبا رجعوها بتعليب جديد و جودة أرووووع و سعرها في حدود 60 ريال

 

تستخدميها بطريقتين:

اما انك تحطي منها نقطة و تخلطيها مع الفاونديشن...أو انك توزعيها بعد الفاونديشن ع مناطق الاضاءة اللي ذكرتها في بداية البوست

 

 

 

الستيك هايلايتر...اللي تجي كأنها روج

 

راح أبدأ من اليمين...اضاءة نيكس راااائعة و تبين طبيعية و كميتها تكفي لفترة طويلة...لونها غريب مشمشي ع لمعة دهبية...أحب أستخدمها فوق البلاشر

 

اضاءة بودي شوب...أفشل شي في الحياة...بشرتي عادية تميل للجفاف رغم كدا تدهن و تتكتل و لونها يقلب ع الرمادي غير انها تذوب بنفس علبتها و تنكسر زي ما انتو شايفين

 

اضاءة اتش آند ام...هو زي الروج و تستخدميه فوق الروج بنص الشفايف يعطيها لمعة حلووووة و مظهر صحي

 

 

 

اضاءة بينيفت و ماك

 

كلهم كريمية

 

هاي بيم عندي من ثلاثة سنوات...و ماقدرت أستخدمها الا كم مرة...سيئة سيئة سيئة...توزيعها صعب جدا...تتكتل و تجف بسرعة...لازم تحطي نقطتين و ع طول توزعيها بسرعة...تبرز عيوب البشرة بشكل مو معقوووول

 

ماك أشوفها عادية...و ما تحسيها اضاءة تبرد القلب...كريمية لدرجة ترفع الضغط...تدهن حتى لو بشرتك عادية...مع التوزيع تخف كثيييير...أكثر من مرة أستخدمها تحت حاجبي و ألاقيها بعد أقل من ساعة اتكتلت

 

 

 

 

من أروع الاضاءات اللي أحبها هي الاضاءات الباودرية المموجة

 

المربعة من بودي شوب و من أروع منتجات بودي شوب

و الدائرية من ماركة مظلومة للأسف اسمها بيغين...ماركة فرنسية وكيلها الحصري زهور الريف

 

دا النوع من الاضاءة تقدري تمرري عليه الفرشاية بشكل كااامل و تستخدميها كبلاشر مموج بملعة رائعة

و تقدري بفرشاية صغيرة تختاري لون معين و تستخدميه تحت الحاجب مثلا

أو توزعيها بضربات سريعة خفيفة ع كامل وجهك

 

 

 

اضاءات بودرية بلون واحد

 

أجمل اضاءة فضية جربتها بحياتي هي اضاءة مكياجي...مالها منافس أبدا

اللون الدهبي منها سيء ما أنصحكم فيه

اللون الدهبي آخدو دااايما من بودي شوب...لكن الفضي من بودي شوب سيء سيء...لونو رصاصي مو فضي ههههههه

 

كميتهم حلوة و تطول معاك لفترة طوييييييلة

 

 

 

 

دا النوع من بودي شوب

 

ع صغر حجمها الا انها تطول ما تخلص...مهما أستخدمها أحسها ما تنقص هههههههههه

بس عيبها تتناثر و بعد فترة تتحجر بنفس العلبة...رغم انو ألوانها حلوة و لمعتها واضحة

 

 

 

 

اضاءة ديور...من أقوى و أروع الاضاءات و تناسب المناسبات و السهرات أكثر..ما أحسها مناسبة لخرجة عادية

هي ليميتد أديشن أو ون شوت للأسف

 

ماري لو...اشتريتها عشان أجربها بس...حلوة و لونها مميز و يناسب كل البشرات...اما بيتي لو لونها برونز غامق و ماتناسب أي بشرة

 

 

 

 

الاضاءة اللي ع شكل قلم

دا النوع حلو عند مدمع العين

 

 

في الأخير اذا كنتي حابة تشتري اضاءة...مو لازم تشتري كل الأنواع

أنصحك بالاضاءة الباودرية و اضاءة ريفلون لأنك تقدري تتحكمي فيها بسهولة

و تستخدميها لكل الأوقات و المناسبات

يعني لو اشتريتي اضاءة مكياجي الفضية و اضاءة ريفلون باللون اللؤلؤي أو البرونز و اضاءة بودي شوب المموجة

كدا كفااااااية و ماراح تحتاجي غيرها باذن الله

 

أتمنى انكم استفدتوا من البوست

 

Golden Scent

 

في شهر 11 عربي عرفت عن موقع قولدن سنت...و أول شي جاء ببالي اني ليه أطلب منو؟ ما راح أحتاجو...و لا خطر ببالي اني أجربو

دا الكلام ألين ما شوفت دا التعليق من متابعة جميلة

كتبت : أنا أعرف انو في منتجات حلوة و أقرأ عنها و أتحمس لها...بس مضطرة أشتري من بودي شوب لأنو المنطقة اللي أنا فيها ما عندنا محل غيرو.

فكرت أكتب عن دا الموقع...فكرتو رااائعة و جديدة و عملية...خاصة انو التعامل معاه مرا سهل من ناحية سهولة الطلب و الدفع و التوصيل

بس وقتها فكرت انو الحمدلله ثقة متابعاتي كبيرة فيا و خوفت أكتب عنو بدون ما أجربو و أخسر ثقتهم و حرام أورطهم فيه

والله اني أعتبر كل وحدة فيكم أخت ليا

المهم...كلمت الموظفة و سألتها عن المنتجات و أكدتلي انها أصلية يعني نفس اللي موجودة في فيسيز و دبنهامز ....الخ

و الصراحة كانت قمة في التعامل

 

أول شي حتكلم عنو طريقة الطلب...و مميزات الموقع

 

دا الموقع

 

http://www.goldenscent.com/

 

تقدروا تشوفوا المنتجات الموجودة بأسعارها بالريال السعودي

 

و تقدري تطلبي منو مباشرة...أو عن طريق الواتس أب و أحس دي الطريقة هي الأسهل خاصة للبنات اللي ما جربوا الطلب أون لاين

 

دا رقم الواتس أب

 

0539089009

 

والدفع تقدري تدفعي وقت استلام الطلب...لأنهم يوصلوا للبيت و التوصيل خلال يومين

 

و اذا كان طلبك أكثر من 300 ريال يوصلوا مجانا

 

في قسم في الموقع خاص بالتخفيضات...شوفوه مرا حلوو...في عطورات تخفيضها يوصل ل 100 ريال

 

الشي اللي كنت أبغاه و مالقيتو هو المناكير ههههههههههه... أتمنى يوفروها لأنو في كم لون أبغاهم من سان لوران و مقطوعين

 

طبعا مع كل طلبية توصلك هدية و عينات

 

دا كل شي تقريبا عن الموقع...نجي لتجربتي

 

 

 

دا البوكس...شكلو حلو و مرتب

 

طريقة الفتح لوووووووول...ترا أنا مهمة بالنسبة ليا لأني أعاني مع فتح الكراتين هههههههههه

 

 

و فتحنا البوكس...شكلو كدا و طريقة التغليف و لون الورق فتح نفسي..و وقتها جاء ببالي انو ينفع تطلبي منو هدية و يوصلوها للي تبغي تهديها...و ماتشيلي هم التفاصيل باذن الله

 

في البوكس قسيمة تخفيض 25 ريال اذا كنتي حابة تطلبي مرا ثانية

 

 

دا كان طلبي...عطر لافي أي بيل من لانكوم...قيد كتبت قبل انو من أروع عطورات لانكوم...دا العطر أعرفو زي اسمي...يعني كنت حقدر أعرف بسهولة اذا هو أصلي أو تقليد و أقدر أحكم ع الثبات...و الحمد لله طلع أصلي...و اتطمنت عشان لو حبيت أرسل هدية أو أطلب مرة ثانية

 

العطر الحجم الصغير 50 مل وسعرو 430 ريال

 

لوشن غوتشي وصلني هدية هو و العينات...اتعلموا الكرم يا فيسز و دبنهامز هههههههههه

بالنسبة للأسعار...أنا شيكت ع الأشياء اللي أعرف سعرها لقيت انها نفس السعر مع زيادة خمسة ريال و أوقات أرخص بخمسة ريال

 

زي أرواج شانيل اشتريت روج قبل فترة بسيطة ب 180 ريال و في الموقع لقيتو ب 175 ريال

 

 

و بس دي كانت تجربتي مع قولدن سِنت

 

هل راح أكرر الطلب مرة ثانية؟

 

بعد ما اتأكدت انو أصلي راح أجربو في حال كنت أبغى أرسل هدية

أو اذا في منتج مالقيتو في المحلات اللي عندنا

أو اذا في منتج لقيتو عندهم أرخص شي طبيعي راح أطلبو

و حشيك ع قسم التخفيضات في حال خفضوا ع شي أنا أحتاجو

 

 

أتمنى اني قدمت لكم شي ممكن يفيدكم