صباح الخير
الصراحة ما أعرف ليه اخترت أكتب دا البوست وتحديدا هنا مو ع الانستغرام
بس لقيت نفسي فجأة فتحت المدونة و بدأت الكتابة
اش أكثر مشاكلنا النفسية...اللي تأثر بمزاجنا طول اليوم؟
و ممكن بسببها نعيش ضيقة و يوصل الموضوع اننا نفقد ثقتنا بنفسنا؟
الكلمة.
كلمة عابرة من شخص تتحكم بمزاجنا و نفسيتنا لساعات و ممكن توصل لليوم كلو.
الكلمة اما تكون حلوة و تسعدنا و تخلينا نشوف الدنيا حلوة و ترفع معنوياتنا...لو كانت تعليق بسيط حتى لو مجاملة...مثلا...الله اليوم شكلك حلو.
ماراح أتكلم عن الكلمة اللي تأثيرها حلو.
لكن حتكلم عن الكلمات السيئة و الجارحة...أو حتى التصرفات.
خلينا نجلس جلسة مصارحة...أخوات و نتكلم مع بعض.
واحد في المية من الكلمات و التصرفات الجارحة تكون متعمدة أو مقصودة.
والباقي مجرد وهم أو توقع سلبي أو سوء فهم.
و حتى الواحد في المية المتعمدة...مو شرط تكون لعيب فيك انتي...أوقات تكون عيب في الشخص اللي قالها...ممكن حاسد أو طبعو جاف أو هو يعاني من ضغوط نفسية و استخدمك وسادة تفريغ.
يعني انتي جالسة تتعبي نفسك و تشحني نفسك بطاقة سلبية ممكن تأثر ع كل مستويات حياتك على شي مالو وجود أصلا.
و أوقات كثيرة يوصل الموضوع لتراكمات مالها أساس بس عشان فهمنا غلط...التراكمات تدمرنا و تحد من انجازنا.
نتكلم بصراحة أكثر؟ و بدون زعل.
تعالي يا الدبدوبة الجميلة...اذا روحتي مناسبة أو جمعة بنات أو حتى مع قريباتك...و ما كنتي على قدر كافي من الثقة بالنفس...اش اللي حيصير؟
كل كلمة تنقال بعفوية أو تصرف عفوي يمس الدبدوبات راح تاخديه بشكل شخصي.
مو شرط تكون الكلمة اللي انقالت تمس الدبدوبات بشكل مباشر...بس انتي لأنك مركزة ع دا الموضوع و ما عندك أساس قوي من الثقة تقدري تحوري الكلمة و تاخديها بشكل شخصي.
فجأة تزعلي و ممكن تستأذني و ترجعي البيت...و احتمال كبير تشكي لأهلك و ماتنامي يومها و تجلس الكلمة بنفسك يوم و يمكن أكثر ع حسب نفسيتك.
و في بنات ممكن يقرروا ما يخرجوا مرة ثانية.
يعني ماشاء الله كل اللي جالسين معاك كاملين؟ مافيهم عيوب؟
الكلام موجه لأي وحدة عندها ظرف معين خاص فيها...البشرة الشعر...متأخرة في الزواج...متأخرة في الحمل...مطلقة...أرملة...قصيرة...طويلة...عندها ظروف مادية...متخاصمة مع زوجها........الخ.
انتي مو مركز الكون.
و لا أنا مركز الكون.
اللي تبغى تزعل و تنكد ع نفسها و تعيش دراما سالي...عادي مافي أسهل منها...تدور بين كلام الناس ع كلمات تزعلها...
ظرفك الخاص اللي انتي فيه وتعيشيه...والله محد داري عنك...لا تتحسسي و تنكدي على نفسك عشان وهم مو موجود أساسا.
الناس كلهم بظروفهم...و الكل لاهي بحياتو خاصة بدا الزمن...
انتي عايشة بوضع معين و تعاني منو رغم انو في ملايين غيرك عايشين نفس الوضع و مبسوطين و لاااااااا همهم و فالينها.
تعرفي لما يقولك اللي ع راسو بطحا يحسس عليها...و اللي بكبدو لحمة نية توجعو؟
انتي نفس الشي...اللي فيك محد حاس فيه الا انتي... لا تاخدي المواضيع بشكل شخصي لأنك انتي الخسرانة بالأخير.
البيوت أسرار و ملياااانة هموم و مشاكل.
بزمننا الحالي...كل شي اتغير وصار صعب مو زي زمان...أقلها الجمعات و الزيارات صارت نادرة.
الكل مشغول و مضغوط...و اذا صارت جمعة و شوفتي عشرة بنات في الجلسة يضحكوا و يهرجوا لا تتوقعي انو ما عندهم شي مكدر حياتهم...بسألك؟ انتي اشتكيتي لهم...اتكلمتي و قولتي يا جماعة أنا أعاني من كذا و كذا؟
تأكدي انهم هم نفسك...كل وحدة الله وحدو العالم اش اللي جوا نفسها وساكتها و بالعة الهم و جاية تغير جو و تمشي.
لا تتوقعي انك مركز الكون و حياة الناس تدور حولك و ما عندهم شغلة الا كيف يضايقوك.
انتي عززي ثقتك بنفسك...و حطي ببالك انو مافي أحد يتعمد يضايقك...كل وحدة تقول ياالله ياالله نفسي.
تلاقيها ترجع البيت و تفكر بهمها و حياتها و تقول الحمدلله خرجت و غيرت جو...الا انتي ترجعي و تحللي كلامهم و تصرفاتهم العفوية و تسقطيها على نفسك و تبكي و تتنكدي و تشحني نفسك و تكرهي الناس.
شوفت نماذج لناس أعرفهم معرفة شخصية والله ما باقي لهم أحد.
قاطعوا كل الناس اللي حولهم و يحبوهم ولو جلست معاهم راح يطلعوا عيب بكل شخص...فلانة قالتلي...فلانة مرت من عندي و ماسلمت و فلانة و فلانة....الخ
في الأخير عاشوا وحيدين.
مين اللي خسر؟
والناس اللي هي اعتزلت الحياة بسببهم و لاهم دارين عنها...و يتسائلوا اش فيها فلانة اتغيرت؟
لأنهم أساسا ما كانو متعمدين.
أنا ما أقولكم انو مافي ناس يتعمدوا الجرح...بس والله نادرين...والله الناس فيهم خير...أحسني الظن عشانك انتي مو عشانهم...اكسبيها دنيا و آخرة و احتسبي أجر حسن الظن.
ما راح تخسري شي.
أمانة عليك قوليلي بصراحة...يعني انتي ما قد صار منك تصرف عفوي و زعلتي أحد؟
كاااااملة مكملة؟
عمرك ما روحت زواج و لما رجعتي البيت قالولك أهلك انو فلانة حضرت و قولتيلهم انك ما شوفتيها و لا سلمتي عليها و تتفاجئي انك مريتي من عند طاولتها ولا انتبهتي؟؟؟؟
عمرها ما صارت انك قولتي كلمة مدبّ و ما مداك تتراجعي؟؟؟
اذا خلاص.
الحياة عادلة...مشي عشان انتي ترتاحي و تعيشي سعيدة بعيدة عن المشاحنات اللي تأثر عليك نفسيا و صحيا.
تسامحي مع نفسك قبل الناس...ترا الحياة قصيرة عيشيها و فليها.
دايما كرري...أنا موووووووو مركز الكون.
أنا مو كاملة مع الناس عشان أطلب منهم الكمال.
و بس أحووووبكم يا أحلى اخوات...كتبت و ماراجعت البوست...وأتمنى انكم ما تزعلوا مني.
اذا حبيتوني تلاقوني ع الانستغرام
sosanita90
