BB Cream - CC Cream - Tinted Moisturizer

صباح الخير...

اخترت اليوم أكتبلكم بوست يخص الميك أب والعناية...وتحديدا الـ BB cream
لأنو عامل ضجة بعالم الميك أب...ولأنو كثير يخلطوا بين البي بي كريم والتينتيد كريم و السي سي كريم اللي ظهر أخيرا
ان شاء الله دا البوست حيكون دليلكم وحبين لكم الفروقات بينهم والنتائج والاستخدامات وبناءا عليهم تقدروا ان شاء الله تختاروا المناسب لكم ولاحتياجكم...
معليش البوست حيكون طويل شويتين...

كل دي المنتجات عبارة عن تسلسل بدأ بالفاونديشن وانتهى بالـ سي سي كريم...ومانعرف يمكن يطوروه شركات الميك أب لشي جديد

اولا الفاونديشن كلنا نعرفوا ( كريم الأساس )
مجرد لون وله قوام كريمي سميك...ويتعب البشرة ويخربها ويظهر التجاعيد بشكل مبكر ويسبب مشاكل للبشرة من حبوب وتفاوت في اللون...الخ
واذا روحتي مناسبة ورجعتي البيت مهلوكة لاااازم تقاومي رغبة النوم وهاتك ياتنظيف للبشرة...وثاني يوم تصحي تلاقي بشرتكي تعبانة.
في ناس عشان مايأنبهم ضميرهم مرا كانو يخلطوا الفاونديشن مع نقطة كريم مرطب بس ماينفع لأنو خصائص الفاونديشن متعبة ومضرة بالبشرة.

هنا ظهر التينتيد Tinted Moisturizer...هو كريم مرطب بس أضافوا له لون...مجرد لون فقط...يعني الناس اللي كانوا يخلطوا الفاونديشن بنقطة مرطب اختصروا عليهم الوقت والجهد وقدمولهم الكريم مخلوط بعلبة وحدة.

هنا جاء حبيبنا الـ بي بي كريم...واللي يسمى كريم المعجزة. وهو اختصار لـ Blemish Balm Cream

من فين جات فكرة دا الكريم؟
في الأساس أخصائيين البشرة الألمان اخترعوا دا المنتج وصنعوه لغرض علاجي بحت...وكانوا يستخدموه بعد عمليات الليزر الجراحية...لأنو يترك أثر للجرح ولون...وكان يجيب نتائج مرا ممتازة ومبهرة.

هنا جاء دور الكوريين...أخدوا دا الكريم العلاجي وأضافوا له لون زي الفاونديشن...بس دا اللون مالو أي تأثير سلبي أو سيء ع البشرة...عشان كدا دايما يقولوا انو ال بي بي كريم يعطيكي بشرة شبيهه بالبشرة الآسيوية في الصفاء والنضارة...
ولأنو تصنيع آسيوي بنلاقي انو سعر الـ بي بي كريم رخيييييص جدا ...بعكس التينتيد ..

متى نستخدم الـ بي بي كريم؟
بأي وقت تحبي...وحطي ببالك انو الغرض منو علاجي مو مجرد تجميلي...يعني تقدري تستخدميه قبل النوم...وتنامي بدون ماضميرك يأنبكي...لأنو طول فترة نومك حيعمل ع تحسين مظهر البشرة وعلاجها...وتقدري تستخدميه وتخرجي في الشمس كمان مرا عادي...

نتائج كريم الـ بي بي:

بشرة صافية...نضرة...توريد...مع الاستعمال المستمر تحسي كأنو بشرتكي خضعت لكورس عناية..

طيب اش الفرق بين التينتيد والـ بي بي؟



BB Cream:

- ينعم البشرة...ويعتمد في تركيبه على عناصر صحية .
- بعض البراندات أو شركات التجميل أضافتلو خاصية التبييض.
- مناسب لكل أنواع البشرة...الدهنية والجافة والمختلطة.
- متوفر بدرجات ألوان مرا محدودة وقليلة بالكثير 3 درجات...والسبب انو يحتوي ع خاصية الـماتشينق أو التطابق...كل الي عليكي تعمليه انك تختاري الدرجة المقاربة لبشرتكي وبمجرد ماتوزعيه كويس حيتطابق اللون...وحيبين مرا طبيعي.
- فيه نسبة SPF أو واقي شمس أعلى من 35.
- يحتوي ع عناصر مضادة للتجاعيد.أو الـ anti-aging
- يعمل كمرطب وفاونديشن و كونسيلر...يعني ماحتحتاجي لأي منتج ثاني...دا كلو بسبب خاصية الماتشينغ اللي حكيتكم عنها.
- يعطيكي لمعة للبشرة كأنها رطبة وقوامه كريمي وبنفس الوقت بريثبل ( يعني يسمح للبشرة انها تتنفس).
- لوووونق لاستينق...يعني يضل لمدة 8 ساعات بدون مايتغير ولا يحتاج لأي تعديل.
- سعرو رخيص...

Tinted Moisturizer:

- ماله أي خصائص علاجية أبدا غير انو يحتوي ع واقي شمس ونسبتو قليلة جدا تتراوح بين الـ 15 و الـ 30 كحد أقصى.
- قوامه أسمك و أثقل من الـ BB عشان كدا تحسيه مزعج ع البشرة.
- مايطول أبدا...تحتاجي تعدليه كل ساعتين أو ثلاثة بالكثير.
- لا تتوقعي منو نتيجة حلوة كالإضاءة والنضارة.
- متوفر منو درجات كثيرة ودا الشي ممكن بعضكم يشوفو ايجابي بس بصراحة هوا شي مرا سلبي لأنك مضطرة تلاقي نفس الدرجة واذا غلطتي فيها ماحتستفيدي منو أبدا...وسبب توفر الدرجات منو لأنو مافيه خاصية التطابق.
- سعرو غالي...لدرجة انو أغلى من الفاونديشن.


آخر شي حنتكلم عن الـ CC Cream
هوا اختصار لـ Color Correction Cream

نفس الـ بي بي كريم بس طوروه و أضافوله ميزة تصحيح لون البشرة.
من وجة نظري انو مايفرق أبدا عن ال بي بي...لأنو ال بي بي أساسا بيعمل تصحيح للون...ما عجبني أبدا حسيت انو الغرض منو تجاري تسويقي فقط لاغير...
وممكن لأنو ال بي بي كوري ورخيص...فجاء دا ال سي سي بسعر أغلى عشان المكاسب.

دا الـ سي سي كريم من كلينيك...أقل من عادي...واللي جربت الـ بي بي كريم...بمجرد ماتجرب دا البرودكت...حتحس بالفرق...

تجربتي

أفضل و أروع بي بي كريم هوا غارنييه...ايوا غارنييه ما غيرها...يجنن دا المنتج فعلا انو ميريكال كريم أو كريم المعجزة...أغرمت فيه و أقنعني بقوة وشوفت نتايجو بعيني حتى ع غيري...
سلس وخفيف ويعمل تغطية رااائعة بيرفكت...تقدري تكثفي كمية الكريم عشان تحصلي ع التغطية اللي تحتاجيها...ريحتو حلوة وبيعطي مظهر هيلثي صحي للبشرة...و يرطب البشرة.

و أخد المرتبة الثانية بمجلة فوغ كأفضل كريم بي بي عالميا...وكان في المركز الأول كريم بي بي تبع ديور...
حسيتهم خلوا ديور في المركز الأول بس عشان يكون المركز الأول لماركة هاي اند...و زي ماتعرفوا انو غارنييه من ماركات الدرق ستور...
ديور ثقيل ويتكتل وحسيتو فاونديشن أكثر من انو بي بي...ومايعطي لمعة النضارة اللي شوفتها بغارنييه.

شايفين تقيل الدم دا...دا البرودكت من بودي شوب...هوا ع أساس انو بي بي كريم...وبنفس الوقت كاتبين عليه انو تينتيد...
سيء سيء سيء...شي بدون أي نتيجة تذكر...يعني حطيتي منو أو ما حطيتي كلو واحد ما يفرق.

وبكدا خلصنا البوست...حاولت أختصرو ع قد ما أقدر وبنفس الوقت أفيدكم بالمعلومات الأساسية...ان شاء الله استفدتوا...
شاروكوني تجاربكم و آرائكم...حبيتوا أيّا واحد فيهم؟ و اذا جربتوا منهم ياريت تكتبولنا تجاربكم...

وأي سؤال أنا حاضرة...في التعليق أو تقدروا تراسلوني ع الايميل...
واذا حابين يوصلكم كل جديد اشتركوا في المدونة بتسجيل ايميلاتكم...

أحوووووبكم... و أشوفكم في بوست جديد ان شاء الله...
 

Ionil-T Shampoo review

 صباحكم خير...

اخترت أكتب عن دا المنتج لأنو نتايجو سريعة ومرضية...ونحتاجو كثير بالذات في الشتوية

شامبو يونيل تي..

 

 

 

كلنا نعمل سكرب أو تقشير للبشرة عشان نجدد الخلايا ونتخلص من الطبقة الخارجية الجافة بقشورها و دهونها

ونحصل ع بشرة جديدة و يصير تقبلها للكريمات والماسكات و كل برودكتس العناية أقوى و بالتالي نحصل ع نتايج أفضل.

طيب والشعر؟

فروة الرأس تحتاج لعمل سكرب كمان لتجديد الفروة وازالة القشور والجلد الميت...ونعطي فرصة للشعيرات الجديدة انها تنمو...

بالزبط دا اللي يعملو دا الشامبو...من مكوناته السالسيليك  اللي يعمل ع التقشير والتجديد بشكل لطيف.

كويس جدا في علاج التساقط والقشرة...وتأثيرو ع التساقط أكثر.

عجبتني فكرة الشامبو انو موجه لفروة الرأس أكثر من الشعرة نفسها...

ومن حماسي له وقد ما أغرمت فيه...استخدمتو ع أطراف الشعر جهة الجبهة...وعجبتني النتيجة مرا انو أزال كل القشور

طريقة استعمالو: أغسل شعري فيه و أشطفو ع طول و أرجع أغسل فيه ثاني مرة و أسيبو ع شعري لـ 5 دقايق

أكرر الطريقة مرة كل أربعة أيام لمدة 6 أسابيع.

مرا حبيتو...ينظف الشعر وفروة الرأس من قلب...تحسيها فعلا تتنفس ههههههه

من أول استخدام صار في لمعة واااضحة بشعري أقنعتني انو فعلا بيعمل تجديد وبيزيل كل الشوائب

لما تستخدموه حتلاحظوا الفرق بينو وبين باقي أنواع الشامبو...

اللي ماحبيتو فيه انو جففلي شعري شويا...الجفاف بس يكون يوم غسيل الشعر...بعدها مع مسحة سيروم يروح

والشي الثاني...الريحة...ريحتو قوية مرا وقت الاستخدام بس مجرد شطف الشعر بالمويا ماتترك أثر للريحة أبدا...

 

تقييمي له 9/10

أعطيه 9 بس عشان الجفاف اللي يسببو...الريحة ما أعتبرها شي سلبي أو عيب لأنو زي ماقولتلكم انها ماتثبت في الشعر.

سعرو:57...و أتوقع موجود بكل الصيدليات...

 

أسعد بتعليقاتكم...واذا لكم تجارب مع الشامبو يبسطني جدا انكم تشاركوني..

 

How to shop at sales

السلام عليكم...صباحكم خير

وأخيييرا بدأت في المدونة الحمدلله

من زمان والمدونة ببالي وكل اللي حولي يشجعوني ويهزأوني هههههه وكل مااتكلمت معاهم قالولي لو عندك مدونة كنتي كتبتي دي المعلومات فيها...

احترت بأي موضوع أبدأ...بس بما انو موسم التخفيضات قريب...لقيت انو أفضل موضوع أكتب عنو هو دا الموسم اللي أغلبنا بنستناه

وأنا أعتبرو من الذكاء في التسوق انو أنا أشتري اللي أبغاه بنصف وربع المبلغ

تدوينتي حتكون عن أساليب التسوق في موسم التخفيضات وكيف نستغلها بطريقة ذكية

 

1-      أهم نقطة هي البداية...واللي تبدأ من معرفة أوقات التخفيض...وطريقتها سهلة جدا كل اللي مطلوب منك انك تروحي للماركة اللي تفضليها وتطلبي منهم الأبليكيشن اللي تسجلي فيه رقمك وتوصلكي أخبار الماركة أول بأول سواء تخفيض أو عروض أو نيوكوليكشن.

الطريقة الثانية انك تدخلي ع الويب سايت تبع الماركة وحتعرفي أخبار التخفيض أول بأول.

 

الطريقة الثالثة تدخلي ع موقع عروض و هو موقع سعودي يعرض كل أخبار العروض والتخفيضات أول بأول بكل شي ممكن تتخيليه.

            دا رابط الموقع:

عروض

 

2-      قبل فترة التخفيض نهاية الموسم اللي بتكون نهاية السنة الميلادية حاولي تاخدي نظرة ع دولابك وشوفي القطع القديمة والمستهلكة واللي تعرفي نفسك انك ماحترجعي تلبسيها واتخلصي منها...لأنو في الأغلب حتستغلي فترة التخفيضات في تجديد دولابك بأقل الخسائر.

وأكيد أكثرنا حيتخلص من الأندروير والبجايم وسليبرات البيت.

 

3-      أكتبي ليستة بالأغراض اللي تحتاجيها...أنا دايما أستخدم نوت الجوال...وأكتب بالتفصيل مثلا غرض كذا من محل كذا و أوقات أحدد حتى اللون والعدد.

وقت كتابة الليستة تقدري تستعيني بموقع الماركة عشان تحددي السعر بالزبط ودا الشي حيساعدك في تحديد الميزانية اللي تحتاجيها.

 

4-      حددنا وخلصنا...وبدأت فترة التخفيضات...أول و أهم نقطة لا تخرجي للمول بيوم تكوني مشغولة فيه أو عندك أي التزام...لأنو حيكون يوم طويل ووقت طويل...خودي وقتك في التسوق وقاومي رغبة اللم والتجميع...ويفضل يكون بنصف الاسبوع عشان تبعدي عن الزحمة...

 

5-      أدخلي ماركاتك المفضلة...ليه؟ لأنو في ماركات كثيرة تاخد من وقتنا ع الفاضي...مثلا نيولوك بالنسبة ليا ولا مرا اشتريت منو لا بتخفيض ولا غيرو ألف في المحل وياخد من وقتي ع الفاضي...عشان كدا ماصرت أدخلو نهائيا.

 

6-      حددي الموسم...انتي بأي وقت تتسوقي ولأي موسم تشتري...أفضل موسم تخفيض هوا نهاية السنة الميلادية زي دا الوقت يعني...ليه؟

لأنوحتكون في قطع شتوية اذا اشتريتي منها حتكوني مستفيدة لأنو الشتا لسا باقيلو شهرين ع الأقل اذا مو أكثر.

وفي نفس الوقت حتلاقي قطع صيفية كثييييرة لأنو آخر كوليكشن صيفي نزل كان قبل نصف شهر فقط...فغالبية الكوليكشنات حيرجعوا يعرضوها مرة ثانية بسعرها الأصلي بعد نهاية التخفيض مباشرة وممكن أغلبكم لاحظ دا الشي.

 

7-      في التخفيض حاولي تبتعدي عن القطع التريندي للموسم...مثلا كان الدوتد و الستريبد ( المنقط والمقلم )هوا موضة الموسم...حتلاقيه بشكل كبيير وقت التخفيض...

ممكن تشتري قطعة وحدة بس عشان تواكبي الموضة...لكن الغلط انك تشتري شوز و حلق وتوب وبنطلون...لتريند أو موضة في نهايتها

مع الموسم الجديد حينزل تريند جديد كالعادة...طيب؟ والقطع المكدسة عندك وماصارلك شهر مشتريتها؟

 

8-      ركزي ع القطع البيسك اللي مالها موضة ولا موسم محدد...واللي نستهلكها كثير وممكن نستفيد منها بأكثر من لوك...مثلا جينز فخم...فستان فخم بلون محايد أسود أو أبيض أو أوف وايت مع شوية اكسسوار ممكن يفك لك أزمة بمناسبة مفاجئة...شوز أسود.

 

9-      ركزي ع الأعلى سعرا...وحاولي تبعدي عن اللي أساسا سعرو مقبول...ليه؟

وقت التخفيض الميزانية محدودة ليه أصرفها ع شي أقدر أشتريه بأي وقت حتى لو بدون تخفيض.

مثلا اكسسوار كان قبل التخفيض 25 ريال وفستان كان 600 ريال...الاكسسوار حيصير ب 13 والفستان 300!

طبعا شراء الفستان حيعتبر هوا المكسب.

10-   استغلي التخفيض في شراء الأندروير والبجايم وأطقم المناشف...الخ.

من القطع اللي مالها تريند معين تقريبا...وتستهلك كثير ونحتاج  تجديدها باستمرار.

 

دي تقريبا الأساسيات اللي حابة تشاركنا بأفكار اضافية ياأهلين فيها...استنوني في تدوينة جديدة...ان شاء الله.

اشتركوا في المدونة اذا حابين يوصلكم كل جديد...