البرا المناسبة.

 

صباح الخير

 

 

بوست اليوم خاص بالبرا كيف نختارها...و طريقة العناية فيها

 

 

 

 

تجاربي مع ماركات اللانجري كتبتها في حسابي ع الانستغرام sosanita90...تحت دي الصورا

 

 

 

 

 

يمكن أكثر مشكلة يواجهوها البنات هي اختيار المقاس الصحيح للبرا.

قبل ما نختار في حاجتين لازم تعرفيها...انو في مقاس المحيط و في مقاس الكب اللي هو نفس الصدر

لما نلاقي مكتوب في المقاس مثلا... 34B...الأربعة وثلاثين هي مقاس المحيط...و حرف ال بي هو مقاس الكب أو الصدر.

 

 

كيف تعرفي المقاس الصحيح؟

 

تلبسي برا مقاسها مناسب يعني مو ضيقة و لا واسعة و تكون بدون حشوة

تجيبي متر القياس...و تقيسي محيط صدرك بالانش...يعني من جهة الأرقام الكبيرة...المنطقة اللي تحت الصدر مباشرة

اذا طلع الرقم فردي تضيفي عليه خمسة.

مثلا طلع القياس 31...تضيفي خمسة...31+5= 36

يعني محيط الصدر 36

واذا طلع القياس زوجي تضيفي 4

 

طيب اذا طلع في القياس نص...مثلا 30 ونص...نتجاهل النص و نحسبها 30 بس.

 

هنا نكون انتهينا من قياس المحيط

 

نجي لقياس الكب.

تحطي المتر ع أعلى نقطة في الصدر...و الرقم اللي يطلع تنقصيه من رقم محيط الصدر

مثلا طلع الرقم 38

36-38= 2

 

اذا طلع الفرق 2...يعني مقاس الكب B

يصير مقاسك 36B

 

 

أوكي؟
 

اذا طلع الفرق 1 يعني الكب A

و اذا كان 2 يعني B

و الثلاثة C

والأربعة D

 

 

 

مقاس المحيط مالو علاقة بالكب...و دي النقطة راح أشرحها ان شاء الله ع الانستغرام

 

 

أغلب الماركات مقاساتها أميركي و انغليزي...و هي اللي تبدأ بالمقاس 30

لكن المقاسات الأوروبية تبدأ من 70

 

يعني ال 70 هو نفسو ال 30 بس بالأوروبي.

 

نجي لموديل البرا...تختلف موديلاتها باختلاف قصة الكب...

 

في الكب الكامل دا اللي تحسيه دائرة كاملة و يكون مرتفع يغطي الصدر كامل...دي القصة تناسب اللي مقاسهم D...ليه؟

لأنو الدي أكبر مقاس...يعي لحجم الصدر الكبير...اذا لبستي البرا ما يكون منظر الصدر مقسوم لنصفين.

 

و في الكب الثلاثة أرباع...دي القصة تناسب ال A  وال B  وال C

 

 وفي اللي قصتو نص و دا يناسب ال A  وال B

 

 

في نوع برا يكون الكب من الأمام فيهم خياطة طولية متصلين ببعض...دا النوع حلو مع القمصان و البلايز الضيقة و القطن.

 

 

 

 

 

ممكن تشتروا دي القطع الاضافية...لزيادة مقاس البرا...و كتبت عنها بالتفصيل في الانستغرام.

 

 

 

العناية بالأندروير.

 

بالنسبة لغسلهم...الأفضل تستخدمي دي الأكياس...تحطي فيها البرا و البانتي و تقفليها و تحطيها في الغسالة...لا تنسي تقفلي مشابك البرا عشان ما تتشابك.

دي الأكياس تستخدم حتى للانجري الحرير و الساتان و الشراريب عشان تحافظ عليها.

موجودة بمحلات اللانجري و سيتي ماكس.

 

وقت الغسيل...انقعيها لمدة خمسة دقايق و بعدين شغلي الغسالة.

 

بعد الغسيل لا تنشفي البرا في النشافة لأنها تخربها...ووقت ما تحطيها في الدولاب...اثنيها و دخلي الكب جوا الكب الثاني.

 

 

 

 

 

 

 

 وفي دي الأكياس خاصة لغسل البرا...تحافظ ع شكل البرا لأنو فيها أطراف بلاستيك .. موجودة بدايسو و بمحلات أبو ريالين.

 

 

ابحثوا عن غلي الأندروير في قوقل...و كيف الفطريات ما يتم القضاء عليها بسهولة و كيف تنتقل عن طريق الغسالة و ممكن تسبب للأطفال و باقي أفراد الأسرة التهابات خطيرة جدا في العيون و البشرة و المناطق الحساسة.

 

ضروري ضروري تبحثوا عن دي المعلومات لأنها بجد مهمة و اهمالها خطير.

 

في الأخير...لا تلبسي البرا لمدة 12 ساعة متواصلة لأنها مهما كانت مريحة الا انها تأثر ع وصول الدورة الدموية للصدر...و لا تلبسيها وقت النوم لأنو طبيعي الدورة الدموية تصير بطيئة و نحنا نايمين و البرا راح تزيد الوضع سوء.

 

 

أتمنى انكم استفدتوا من البوست.

 

مدونة سمر

الانستغرام sosanita90