صباح الخير...
زي ما وعدتكم ع الانستقرام اني حنزلكم مشترياتي من ايف روشيه
أحب ايف روشيه و أثق في منتجاتهم لأنو ببساطة ولا مرا خيبوا ظني بأي منتج من المنتجات...كنت أستنى الماركة تفتح في السعودية من زمان...لأنو مرا من المرات مغربية جلست تمدحلي في الماركة وفي منتجاتها و جلست تحكيلي انو ماعندهم ولا فرع في المغرب لها...بس انهم كانوا يروحوا لأسبانيا ويشتروا من هناك...و من وقتها بحثت عنها في النت و عرفت عنها أكثر وحبيتها أكثر...
ما تتخيلوا فرحتي لما فتحوا فروعهم في السعودية...اشتريت منهم أشياء كثيرة ولله الحمد ولا شي ندمت عليه...
أول شي حابة أذكر لكم معلومات بسيطة عنها...
الشركة هي لصاحبها الفرنسي ايف روشيه واللي اتوفى عام 2009...ايف روشيه كان يعيش في قرية وكانت أمو تجمع الزهور و النباتات وتعمل منهم وصفات علاجية...ولما كان عمر ايف روشيه 14 سنة أتوفى أبوه...ومن وقتها صار هوا اللي يساعد أمو في دي الشغلة و اتعلم منها وصفات كثيرة...واستمر ع دا الحال سنواااات واتطور في الموضوع وصار يعمل وصفات علاجية تجميلية...عام 1958...اشترك في مجلة وكانو القراء يطلبوا منو وصفات ويراسلوه ع البريد وكان يجهزها لهم ويرسلها...واشتهر بسبب مصداقيتو وانو كانت وصفاتو جدا مرضية لهم...يعني جابر القحطاني النسخة الفرنسية لوووووول
بعدها بثلاثة سنوات افتتح شركتو...طبعا هوا أول شخص ابتكر دا العلم...اللي هوا العناية النباتية...المسمى لوحدو حكاية ويخليكي تحبي الماركة أكثر...
كل شي بمكونات المنتجات طبيعي ويعتمد ع النباتات والزهور...في دلع أكثر؟ أصلا المحل بمجرد ماتدخليه و تبحبشي في منتجاتو وتقري المكونات وتشمي الروائح تحسي بالرومنسية...
تخيلوا انو منتجاتهم تخضع لفريق أطباء وعلماء وأخصائيين بشرة...يعني مافي شي يطلع كدا...عندهم سيروم أخد من وقتهم 8 سنوات أبحاث عشان يكون جاهز ويعتمدوا تركيبتو...
كمان في نقطة حابة أذكرها...انو أول شركة أحس انو في تقارب وتواصل بينها وبين الكستمرز...مو ساحبة عليهم...مثلا كان عندهم مرطب للوجه مرا حلو وكان عليه اقبال مرا كبير...وكانوا الكستمرز دايما يقولوا انو المرطب كويس بس ياريت فيلو ريحة عطرة...وكانت الشركة تقول انو هوا طبيعي وعلاجي...في الأخير قطعوه لمدة سنة ورجعوه لهم بريحة خفييييفة من مادة عطرية نباتية طبيعية...عشان ما يأثر ع البشرة
والشي الحلو...انو شامبواتهم خالية من السيليكون والبارابين والملونات...
مرا طولت عليكم...تعالوا شوفوا مشترياتي منهم أمس...جلست أنبش في المحل يجي ساعة و أحس لسا ما أرضيت نفسي وناوية أرجعلهم يوم ثاني قريب باذن الله...
هنا مشترياتي
لوشن أقرب للكريم الثقيل...يرطب ويرطب ويرطب...ترطيبو مرا عميق وحلو...في البداية أول ماجربتو حسيت ترطيبو نفس هيمالايا اللي كلمتكم عنها قبل...بس بعد تقريبا ساعة لاحظت لمعة ونداوة بيدي...طلعت من دا اللوشن...ولأني مجربة من قبل لوشنات التوت والتفاح اقتنعت فيه واشتريتو والحمدلله اني اشتريتو...
دا بالشوفان العضوي...طبيعي...ريحتو مو قد كدا...ريحة شوفان...كأنك فاتحة علبة شوفان وتشميها ههههههه ودا اللي خلاني في البداية ما أشتريه...بس عادي بخة بودي سبراي ونقضي ع الريحة ههههه...
غسول منظف ومهديء للبشرة...لكل أنواع البشرة وخصوصا للي بشرتهم تحمر وتطلع لهم حبوب بعد التنظيف...من الأكثر مبيعا عندهم...في نوع ثاني من نفس المجموعة لكنو حليب منظف...بس أنا يناسبني دا أكثر...أسهل...أكره شغلة القطن و خودي قطنة وأمسحي و أرمي يووووه
شاور جل حليبي...يعني فيه نسبة ترطيب عالية...خالي من المادة الصابونية اللي تجفف...وديودارنت
انتو بس شوفوا الاسم
بزهرة القطن الهندية
ريحتو هاااادية وناعمة مرا...
دا الشي فكرتو راااائعة...و أتوقع انهم الشركة الوحيدة اللي فكرت بمنتج من دا النوع
خل للشعر
مو نحنا بطريقتنا التقليدية نشطف شعرنا بالخل كآخر خطوة في الشاور...لأنو الخل يعطي لمعة لشعرنا ويخلصو من المواد الكيماوية الضارة اللي
التصقت فيه من الشامبو...ويخلصوا كمان من طبقة السيلكون اللي تغلف شعرنا بسبب الشامبو واللي تراكمها يسبب تساقط للشعر ويبهتو...
دا كمان خل لكنو بريحة التوت...يشطف فيه الشعر
شايفين كيف ايف روشيه يدلعونا
دا لشي الجمييييل...أنا أسميه زيت الطيبين ههههههه
لا لا بجد
هوا زيت ترطيب وكمان ينفع للمساج...لما ترطبي فيه بشرتكي ماتحسي باحساس انو زيت وشي دهني
لأ احساس برطوبة حلوة ونعومة
ريحتو ريحة ورد هااااادية...ما أعرف كيف أفكركم فيها...بس متأكدة لما تشموها حتفتكروا ريحة أمهاتكم أيام طفولتكم
ترا بجد أتكلم
عشان كدا أقولكم انو زيت الطيبين
حتى ماما لما شمتوا تقوللي ياااااه حسيت حنين وفكرني بأيام قديمة
شكلو كان في عطر أو كريم قديم نفس ريحتو
المهم جربوه وانتو حتعرفوا عن ايه أتكلم
آخر شي فرشاية الأظافر
اللي نستخدمها وقت البديكير لتلميع الأظافر وعشان نشيل الطبقة الجافة
يمكن تقولوا انو فرشاية عادي مافيها شي مميز
بس أنا أقولكم من خبرتي في البديكير لسنوااااات وجربت خلالها فراشي كثيرة
انو فرشاية ايف روشيه غير
فرشايتي المفضلة من أيام ماكان لونها شفاف قبل النيولوك ههههههه
حبيتوا ايف روشيه ؟ا ش اللي حبيتوه من المنتجات اللي حكيتكم عنها ونفسكم تجربوه؟
اذا جربتوا شي منها قبل كدا ياريت تشاركوني تجاربكم...
أنبسط بتعليقاتكم وتواصلكم معايا...و دا الشي يفيدني كثير في المدونة...
أشوفكم في بوست جديد ان شاء الله
احب دي الماركة ، عجبتني فكرة الخل بالتوت
ردحذفجربيه ان شاء الله يعجبكي
حذف
الي عجبني في هذه الماركة ان اسعارهم حلوة
ردحذفمو مبالغ فيها
وجودتها كمان حلوة
فعلا زي ما وصفتيها جودة عالية بأسعار رخيصة
حذفوش رايك بعطورهم
ردحذفمميزة وحلوة مرا
حذففين موقعه ب المدينه!؟
ردحذفالنور و الراشد والعالية
حذففين موقعه ب المدينه!؟
ردحذفام جولي
ردحذفالله يسعدك الله يسعدك
معلومات اسلوب كل شي ماشاء الله تبارك الله
استفدت منك كثير
بسالك قريت مره بتعليقات الانستقرام انك تكلمتي عن لاين بيور من ايف روشيه
تقصدي هذا البوست او تكلمتي عن المجموعة كامله؟ لاني ناويه على عناية من ايف روشيه
برضو سؤال ثاني =$
سمعتي عن جلستت بيور وايت للوجه ؟ ايش رايك فيها امنه ؟
كثير يمدحون جل اﻻسترخاء ماجربتيه؟؟
ردحذف.
ردحذففين الاقيها في جده
ردحذف