منتجات ما أستغني عنها...( ميك أب )...

صباح الخير...

 

اتكلمت في تدوينتي السابقة عن منتجات العناية اللي دايما موجودة عندي...يعني زي الأساسيات...أجرب و أضيف و أغير...بس هي ثابتة...

بوست اليوم حيكون جزء ثاني بس دا الجزء يخص الميك أب...

 

الميك أب في تطور مستمر وكل يومين طالع منتج جديد ...أحب أجرب بس بعد ما أقرأ تجارب و ريفيوز عنو...

لكن دي الأشياء اللي حكتب عنها اليوم...هيا من الأشياء الضرورية اللي ماتتغير أبدا...

 

 

 

أخدت وقت عشان أقرر أي المنتجات أكتب عنها...و في الأخير اخترت دي المجموعة عشان ما يكون البوست طويل

 

 

بي بي غارنييه...من أفضل و أروع أنواع البي بي وكتبت بوست سابق عنو...حلو حتى في أدق التفاصيل

لمعته و احساسو ع البشرة مرا خفيف كأنو كريم مرطب و ريحتو مرا حلوة وزي ما قولت قبل انو فيه خاصية الماتشينق أو تطابق اللون مع البشرة...حتى انو يغني عن استخدام الفاونديشن في النهار و في الخرجات البسيطة

 

الفاونديشن الثاني هو سليب افكت من بورجوا...ماأدري للمرة الكم اشتريتو...اللي أعرفو انو صارلي أكثر من ثلاثة

سنوات وهوا كل مايخلص أشتري واحد جديد بدون تفكير...رغم اني كنت أستخدم قبل الهيلثي مكس كمان من بورجوا بس لقيت دا أحسن بمراحل...يعطيني اللوك الديوي اللي يكون بلمعة صحية ونضرة...ومرا خفيف ع البشرة...مناسب للي تحس وجهها شاحب

أو بشرتها مرهقة لأنو يعطيكي اشراقة مرا حلوة...من اسمو تأثير النوم لعشرة ساعات...

 

 

 

استمريت سنوات طويلة و أنا أستخدم بيس سماش بوكس الموف...ولما انقطعت الشركة فقدت الأمل اني ألاقي بيس بنفس نتيجة وروعة سماش بوكس...و لو أقولكم اني ماخليت بيس الا وجربتو ما أبالغ

ومرة كنت بدبنهامز و أجرب ...وكانت وقتها بوبا جديدة عندهم...ولما شافني الموظف مو عاجبني شي...قاللي انتي أكيد كنتي تستخدمي سماش بوكس...ونصحني ببيس بوبا والحمد لله اني اشتريتو

من بعدها مافكرت أغيرو...

ينفع للبشرة الباهتة ينورها مرا ويعمل ريفليكشن انعكاس للإضاءة...أي اضاءة حتعكس ع وجهك فتعطيكي اشراقة رائعة

ملمسو ع البشرة مخملي...وأوقات أكون مستعجلة فأستخدم الفاونديشن بدون البيس و ألاحظ فرق كبير...يطلع باهت ووقت الشتا تبين شوية قشور قريب من أنفي

مرا بالصدفة جربتو ع شفايفي وحسيت بالفرق حتى مع الروج

 

 

 

بودرة ماكس فاكتور الدهبية...أستخدم شانيل كلير للمناسبات وماكس فاكتور للخرجات العادية...ومالقيت فرق بينهم أبدا

غير انو بودرة ماكس فاكتور درجة بورسلان فيها نتفة لون بسيييييطة أكثر من شانيل كلير

كلهم نفس النعومة...ووقت توزيعهم ع البشرة ماتحسوا في طبقة متطايرة من الباودر...

تندمج بالبشرة وتثبت...

 

 

شادو شانيل اللون أسود...ما مر عليا شادو أسود من قلب وثابت زيو حتى انو مايتناثر ع الخدود...وبتمريرة بالفرشاية مرا وحدة يثبت اللون وياخد لون كثير مايحتاج تعيدي أكثر من مرا...أنا أستخدمو ع خط الرموش السفلية...و أموه الخط و أنعمو بفرشاية ربل

 

اللي جنبو بلاشر ريميل...لونو غريب وطبيعي...للآن مامرت عليا نفس الدرجة بأي بلاشر ثاني...أول مرا شوفتو ع أختي ومرا عجبني و سألتها عنو...وقالتلي انو حتى في العمل دايما يسألوها عنو...مرا ملفت ولون مميز...طبيعي ويعطي البشرة لوك دافيء

 

 

دا اللون...شايفين كيف طبيعي..طبعا سيبوكم من الفرشاية اللي معاه لأنها سيئة في الدمج وتوزيع اللون...بس ممكن تستفيدوا منها في الكونتورينق...بالذات ع خط الفك

 

 

شايفين الوصف...الفينيش لمعة طبيعية...وانو لوووونق لاستينق...يعني ثابت

الدرجة 120 pink rose

 

 

قلم الحواجب من مينكس مكياجي...لونو بني متوسط ...حلو في الرسم وثابت...ممكن تلاقوا زيو بأي ماركة...لكن المميز والحلو فيه

هوا الطرف الثاني...لونو بيج ...تحددي فيه المنطقة حول الحاجب...ينورها ويبرز الحاجب...وثباتو مرا حلو

 

 

 

نفس الهاي برو من بينيفت بالزبط...نفس درجة اللون والقوام والثبات

 

 

 

 

كحلي دايما بكل مكان أنسأل عنو...من اللي أعرفهم واللي ما أعرفهم...

كنت أعشق كحل شانيل ولا أفكر أغيرو...بس لقيت اللي أفضل منو بمراحل...سوادو أقوى وثاااابت ومايحسس العين...لدرجة اني أستخدمو وأنا لابسة العدسة الحمدلله ولا مرا حسس عيني...ويكفي تمرري القلم مرة وحدة...مايحتاج تعيدي

 

هوا دا...كحل صبايا من مكياجي...بس انتبهوا ترا عندهم نوعين نوع عادي فااااشل وبقوة...ونوع اللي طرفو اسفنجة تمويه وتنعيم خط الكحل زي كدا...اللي باسفنجة هوا اللي أنا أقصدو...

 

 

 

شوفوا الفرق...لاحظوا شانيل يترك فراغات مايعبيها...لكن صبايا خط واحد أسود

 

 

 

ليب لاينر من بريستيج...لونو مرا طبيعي ويمشي مع درجات الأرواج الناتشورال الطبيعية...لما أستخدمو يلغي حدود الشفايف ...

اذا أبغى لوك البيبي ليبس أعبي كامل الشفايف فيه وبعدو أستخدم غلوس شفاف...يصير شكلهم مرا طبيعي وحلو

 

 

هنا الدرجة...مقارب لليب لاينر سبايس من ماك بدرجة كبيرة

 

 

 

شوفوا اللون

 

 

 

هايلايتر أو اضاءة مينكس من مكياجي...

كنت كل ما أجرب هايلايتر لتحت الحاجب أحسو مايل ع الرمادي...وكنت أدور ع درجة تعطيني اضاءة حلوة بدون مايكون لها لون محدد والأهم انو مايكون فيها رمادي أبدا...من بين اللي جربتهم بودي شوب وكانت سيئة اللون الرمادي واضح وبقوة...

وبيوم كنت رايحة أشتري الكحل وجربت اضاءة مينكس مرا عجبتني وحسيت اني أخيرا لقيت الهايلايتر بنفس الدرجة اللي أبغاها

 

 

 

شوفوا درجة اللون اللي أقصدها...بالنسبة للدهبي أستخدم الباتروس من نارس وبيرل من ماك...بس قلييييل استخدامي للهايلايت الدهبي

 

 

 

 

من أحب الأرواج لقلبي...واللي لازم كل فترة أكرر شراءه...كريمي ويرطب الشفايف ولونو كثيف وغني...ثباتو عادي...

 

 

 

 

 

 

رقمو 22

 

 

 

أنا انسانة ما أعترف بالغلوسات...أفضل الأرواج خصوصا الكريمية...واذا كان لابد من الغلوس فهو الشفاف كفاية...

ماأقنعني الا غلوسات شانيل...رااائعة...ألوانها واضحة وكثيفة ولمعتها رايقة ...حتى لو استخدمت الغلوس لحالو أحسو يغني عن الروج...

 

 

 

 

 

من أحلى الدرجات اللي تناسب كل الأوقات...حتى لو الصباح يكفي منها مسحة بسيطة...

 

 

 

عندي ولاء مو طبيعي لماسكارا ديور...ديور شو بلاك آوت...سوادها حلو...ودا النوع ماسكارا الكحل العربي...قوامها كثيف ونفس الفرشاية تلقط كمية كبيرة...الحلو فيها انها تلون حتى الرموش الصغيرة...الشي الوحيد اللي مو حلو فيها انها ماتجف بسرعة...

لازم تنتبهي انو ماتفتحي عينك بقوة عشان الرموش ماتلامس البشرة وتبقع الماسكارا فيها ويخرب الميك أب...صارت لي أكثر من مرا...

أستني عليها شويا وتجف...

 

 

 

أنا دحين مسافرة...و آخدة معايا دي المجموعة...بالاضافة لأكحال ملونة وأرواج و باليت شادو...وولا مرة حسيت انو في شي ناقص في الميك أب...أو اني ندمت ع شي في البيت وماجبتو معايا...دي الأساسيات اللي فيها أعمل اللوك اللي يناسب كل الأوقات...

 

 

 

 

أي استفسار أنا حاضرة للرد...أتركوا تعليقاتكم لأني مرا أنبسط فيها...