سمول ليس القياس الوحيد للأناقة

صباح الخير

في البوست السابق وعدتكم انو حنبدأ ان شاء الله سلسلة بوستات تخص الخدع البصرية اللي تساعدنا اننا نظهر بأحسن صورة

أول فئة حبيت أبدأ فيها...هي الخدع اللي تساعدنا اننا نظهر بشكل أنحف و أرشق...

للأسف انو البنات اللي عندهم زيادة وزن حصروا نفسهم في اللون الأسود أو الغوامق عامة

ماننكر انو اللون الغامق يساعد انو الجسم يبان أضعف...بس بشكل بسيط جدا

في تكنيكس أو طرق وخدع ثانية ممكن نلعب فيها تعطينا نتيجة أقوى و أجمل...وما حنحرم أنفسنا من ولا لون وولا ديزاين

...تقدروا تلبسوا اللي نفسكم فيه بس بذكاء...

راح نبدأ...بالخامات...

 

حاولي تبتعدي عن البلاسيه اللي هوا المكسر...وعن الخامة الفلاشي أو التفتة...

التفتة زي الهايلايت في الميك أب...نستخدم الهايلايت عشان نوسع أو نعطي مساحة أكبر لمنطقة معينه في الوجه زي تحت الحاجب

كمان الخامة الفلاشي تعكس الضوء فتعطي الجسم حجم أكبر

 

 

 

الخامة الخربوشية لووووول...اللي تكون نقشتها صغييييرة مرا أو برسومات عشوائية

من الخامات اللي تعطيكي حجم أكبر وتظلم الجسم...عارفين ليه؟

 

 

شوفوا الصورا فوق...لأنها تعمل خداع بصري...مافي تركيز مافي شي محدد...بجد تزغلل العين ههههههههه

 

ابتعدي عن البلات فورم شوز ...اللي يكون مرتفع من عند الأصابع...يكون في زي القطعة من تحت...واعتمدي دا الديزاين اللي يكون منخفض...لأنو يشد عضلة الساق الخلفية فيعطيكي مظهر أرشق...حتى وقفتكي ومشيتكي حتبين رشيقة

 

 

 

من الخدع المهمة واللي تعمل فرق كبير...هي انك تغطي الجزء الممتليء في جسمك  و تكشفي الجزء النحيف...مو هنا الخدعة...

الخدعة انو في أي نقطة بالزبط نكشف

شوفوا الصورا اللي فوق...غطت منطقة الزند لأنها ممتلئة...لا حظوا نهاية الكم...الكم وقف عند أول نقطة نحيفة في يدها...

دا الشي عمل تنساق أولا...ثانيا...انو العين أول ماتجي ع الجزء النحيف المكشوف حترسل اشارة للعقل انو أهااا حتى الجزء المستخبي نحيف...

 

 

لاحظوا الكم...الجزء السفلي من يدها نحيف...بمجرد مانشوف يدها حنقول انو جسمها كلو نحيف وماحننتبه لامتلائها

 

 

السكيني بلت...أو الحزام النحيف...من القطع اللي تعمل تلاعب وخداع بصري...

لما نلبس حزام نحيف كأننا نقول انو هنا في خصر...مجرد تحديد...

لكن لو كان الحزام عريض...حنرتكب أكبر غلطة...لأننا حنقسم جسمنا نصفين...وحيبين الجسم كأنو مضغوط

 

في نقطة مهمة لازم نراعيها في السكيني بلت...انو فين المكان اللي المفروض نحطو في بالزبط؟

دا الشي يعتمد ع طولك اذا انتي طويلة أو قصيرة...وحيكون ببوست ثاني ان شاء الله...

 

 

لاحظوا الحزام...لو مالبست الحزام...كان حيبين الجسم كأنو مربع

 

في الميك أب نستخدم الكونتورينق أو التحديد...الشيدينق أو التظليل باللون الغامق ننحت في المناطق اللي نبغى نضعفها زي الأنف و الخدود...واللايتينق أو الفاتح نوسع  في المناطق اللي تحتاج توسعة...

نفس التكنيك بالزبط نطبقوا في القطع اللي نلبسها...المنطقة الممتلئة نلبس لها غامق والمنطقة النحيفة نلبس فواتح...

لاحظوا الصورا اللي فوق...ممتلئة في الجزء السفلي فلبست بنطلون أسود...ونحيفة من فوق فلبست بينك و أبيض عشان تعمل توازن بين الجزئين

 

 

نفس التكنيك...الممتليء بالغامق والنحيف بالفاتح

 

 

مونوكروماتيك لوك...أو اللوك الأحادي

من أذكى الخدع اللي تبينكي بشكل أضعف و أطول...

مهما كان جسمك ممتليء جربي تلبسي لون واحد أو تدرجات لون واحد...حتطلعي بشكل أرشق بكثير...

 

 

لاحظوا رغم انو لون فاتح...الا انو ناسبها جدا...

 

اللون الواحد أو تدرجات اللون...يعمل خداع بصري...بانو النظر يمتد بشكل عمودي من فوق لتحت ...دا التكنيك يخليكي أطول و أنحف

 

 

كيم كارديشيان اعتمدت دا اللوك من بعد ولادتها...أكثر طلاتها كانت باللون الأحادي...

 

 

 

لو عندك قطعة مربعة...وجزأتيها بشكل طولي لقطع أصغر...حيتكون معاكي مستطيل...وشي أكيد انو المستطيل أنحف من المربع...مو؟

 

شوفوا الصورا اللي فوق...مين يصدق انو بس غيرنا التوب وصار دا التغيير كلو...

مع التجزئة الطولية...صارت عندنا أجزاء أصغر و أنحف...وصار في خط عمودي بالطول في النص...اللي باللون التركواز...دا الخط العمودي حيسحب النظر من فوق لتحت...

العين بشكل تلقائي ماحتشوفهم بشكل كلي

دا التقسيم حتى عقلنا حيشوفوا...فيعطينا ايحاء بالنحف

 

 

شايفين التقسيم...أبيض أورانج أبيض...

نظرنا حيشوف العمود الأورنج اللي في الوسط...ويتجاهل اللون الأبيض اللي في الأطراف

 

 

 دا الديزاين قمة في الذكاء...ما اكتفوا بالخط الأسود اللي فوق عشان يعملوا تجزأة

عملوا كمان خط طولي في الجزء السفلي...منها حيعمل تقسيم ويحول الجزء السفلي لمستطيلات عمودية نحيفة

ومنها يسحب النظر من فوق لتحت

حاولوا تلغوا الخطوط العمودية السودا...واجمعوا كل الأجزاء...حتتفاجئوا بوزنها

برافو للمصمم...

 

 

 

تصميم ستيلا مكارتني الشهير...نفس التكنيك

مو شرط تكون الجوانب باللون الأسود...حتى الأبيض يعمل فرق...النتيجة خط عمودي

اختيارها للقميص ذكي...لو كان القميص كلو باللون الأبيض وحتى لو كان كلو أسود ما حيناسبها كدا

....

 

 

البنطلون...أنسب قصة تناسبكي هي الستريت لاين...أو المستقيمة...وتغطي الشوز...كدا حتعطيكي طول و رشاقة

كيم ذكية في اختيار دا الديزاين

 

 

 

مع موضة التنانير الطويلة والملونة...البسي وعيشي حياتك...بس ابتعدي عن الديزاين أو التصميم اللي يكون واسع بدي الطريقة من تحت...اختاري التنورا بقصة ستريت لاين أو المستقية زي البنطلون...ويفضل تلامس الأرض...مو تسحب...لأ مجرد انو طرفها يلامس الأرض...أو انها تكون واسعة بطريقة منسدلة لوووووووووول ماعرفت وصف ثاني...بس شوفوها في الصورا اللي تحت

 

 

واسعة بطريقة انسيابية بسيطة ممتدة من فوق لتحت

 

نجي للسترايبد أو المخطط...الشائع انو المخطط يعرض ويزيد الوزن...ونظرية الستايليست بالأدلة تثبت العكس تماما...

أولا...اذا كانت الخطوط عادية ...نختار القطعة اللي لونها أسود أو غامق و مخططة بلون أبيض أو فاتح...مو العكس

يعني ماتكون القطعة لونها أبيض ومخططة بأسود...

الفرق واضح في الصورا...اللي ع اليسار لأنو لونو أسود و مخطط بأبيض أعطانا ايحاء انها أطول و أنحف

واللي ع اليمين رغم انو الخطوط طولية لكنها بينت أقصر و ممتلئة لأنو الفستان لونو أبيض و الخطوط سوداء...

 

بطتنا بطت بطن بطتكم لوووووووووول

 

أعرف يحتاجلها شوية تركيز

 

الموضة المخطط...وما حرمت نفسها منها...الفستان صح مخطط...لكنها اعتمدت خدعة التجزئة العمودية...

من الجوانب أسود...و عيوننا ما حتنتبه الا للجزء العمودي الرشيق المخطط اللي في الوسط...

برااافووووو

 

الخطوط النحيييفة المتساوية...تعمل خداع بصري...وتشد النظر بشكل عمودي من فوق لتحت

وصرنا نشوف البنت الأنيقة اللي ماشية ع الموضة ونحيفة و طويلة

لاحظوا انها غطت الزنود...الكم يوصل للأكواع لأنو باقي يدها نحيفة...

 

الخطوط المتباينة...شي عريض وشي نحيف... بسمك متفاوت...تكنيك ممتاز وذكي...

 

 

 

أولا ...التوب الأسود عمل خط عمودي طولي...ثانيا ...الخطوط المايلة تسحب النظر كمان لتحت......

جسمها ممتليء من فوق و استخدمت الخطوط العرضية بتكنيك لصالحها...كمان برافوووو

 

 

 في بعض القطع تكون من الأطراف طويلة...زي تصميم دا الكارديغان

القطعة الطويلة من الخدع اللي تعمل خط عمودي يعطينا مظهر أرشق و أطول

 

 

طريقة لبس البيبلوم كتبت عنها في الانستغرام ممكن تطلوا عليها

sosanita90

 

ولا تنسوا انو المنطقة المليانة ابتعدوا عن لبس القطع اللي فيها تفاصيل ممكن

تجذب النظر لها

حاولي تركزي النظر ع منطقة ثانية نحيفة

 

 

دحين راح أعرض لكم بعض اللوكات اللي ممكن تساعدكم...وحنشوف كيف البنات استفادوا من الخدع البصرية لصالحهم

 

 

طول الكم

التقسيم الطولي

الخط الرمادي العمودي

تخيلوا الفستان بدون دا الخط اللي في النص...كنا حنشوف مساحة كبييييرة باللون الأسود قدامنا وحنلاحظ وزنها

 

 

بجد بجد أهنيها...رغم وزنها الا اني أشوف فيها كمية نعومة وكياتة وثقة وأناقة

عاجبها الأوفر سايز كوت البينك...ماحرمت نفسها وقالت لااااا خليني ألبس أسود في أسود و أكبت نفسي في الغوامق عشان أبين أضعف

 

لبست البينك...واتبعت تكنيك الغامق للممتليء و الفاتح للنحيف

ولبست توب رمادي...وسابت الكوت مفتوح عشان تعمل خط عمودي

 

 

يانااااس ع الثقة...بجد بجد حبيتها

اتبعت تكنيك المونوكروماتيك...ولبست أوفر سايز كوت...وعملت خط عمودي...

حنحتاج دي الصورا للبوست الجاي ان شاء الله عشان اللي جنبها هههههه

 

 

في ثقة أكثر من كدا

متصالحة مع نفسها

شعري كيرلي...أوكي فين المشكلة...مو لازم أحرقو وأهلكو بالاستشوار والستريتنر

اش أبغى بشعر ناعم و أطرافو دبابيس ومحروق وباهت ومتقصف و أنا أقدر أرتب خصلات شعري الكيرلي الجميلة اللامعة الصحية

ولبست مخطط بطريقة ذكية عمودية وماقالت يعرضني

 

 

الغامق للمتليء

الفاتح للنحيف

خط عمودي

أكمام تظهر الجزء النحيف

وحزام نحيف

و أأنق من أرشق رشيقة

 

 

أهنيها

مونوكروماتيك

طول الكم مناسب

قصة التنورا مناسبة

بس كان ناقصها شي واحد...اللي هوا طول التنورا

 

 

بلايزر عشان نعمل خط عمودي أو طولي

الغامق للمتليء

الفاتح للجزء النحيف

 

 

وبكدا خلصنا يا جميلات

بليز ماأبغى وحدة تقول ما يناسبني بعد اليوم....أحوووووبكم