تجربتي لجهاز كلاريسونيك

 

صباح الخير...صارلي زمااان عن التدوين

 

كثير طلبوني أتكلم عن كلاريسونيك...

 

حتكلم عنها بكل شفافية...حعتبر اني لسا ما اشتريتها...و اني ناوية أشتريها وجالسة أبحث بقوقل عن تجربة تفيدني...

 

 

 

قبل ما أشتريها بحثت كثير عنها...وللأسف كل التدوينات والتجارب اللي كنت أقراها عنها...نفس بعض بالزبط...

تجارب سردت مميزات الفرشاية...نفس اللي مكتوب عنها بموقع الشركة...انها تشتغل لمدة دقيقة...عشرين ثانية للوجه وعشرة لكل خد وهكذا...الخ

 

قررت أشتريها...وأجرب بنفسي...

 

اللي اشتريتها ميا...بسرعة وحدة...وفرشاية وحدة للوجه...يجي معاها شاحن وغسول

 

عشان أكون واضحة معاكم...كثير كنت أقرأ عنها تعليق ( كيف كنت عايشة بدونها)

كنت أتمنى اني أقول دي الجملة...بس كنت عايشة بدونها...و أتوقع اني أقدر أعيش بدونها...

 

طلبتها أون لاين من أمازون...ولما وصلتني ظليت يوم كامل قبل ما أستخدمتها موقفة غسولاتي و السكرب وكل شي من عناية وجهي لأني أبغى أشوف الفرق...بعد يوم استخدمتها

 

استخدمتها مع غسولها...الغسول أتعب أقولكم سيء...مدمر للبشرة...ريحتو قوية قوية قوية...كأنك تغسلي وجهك بعطر رجالي

لدرجة انو ريحتو ثبتت بالحمام كأنو شاور جل

بعد أول استخدام وقفتو...وثاني يوم...طلعت ع أطراف شعري من جهة الجبهة كاملة حساسية واحمرار وتسلخات وطاح شعري كثييير...الشعر الصغير اللي بأطراف الجبهة تقريبا كلو طاح...اتعالجت بأدوية ومراهم والحمدلله

 

كتبت تجربتي مع الغسول...لأني كنت ناوية أطلب الغسول لوحدو والحمدلله اني ما طلبتو

 

أول مرا استخدمتها...كنت متوقعة ألاقي بلاوي في الفرشاية...لكني انصدمت انها نظييييفة كأنها لسا جديدة وما شوفت الوسخ اللي كانو يتكلموا عنو...كانت عندي أختي متحمسة للنتيجة ولما وريتها الفرشاية انصدمت

 

 

 

 

 

 

 

 

 

 

 

استخدمت الفرشاية مع غسول كلارينس مورينقا بس مخلص مو نفس اللي في الصورا...ومع غسول ايف روشيه...

كنت متوقعة انها تعمل رغوة...بس طلعت غير توقعاتي...ما في رغوة و لا فقاعات هههههههههه بس تحسي بوجود الغسول وشي صابوني خفيييف وناعم...ومع أي غسول أستخدمو كانت نفس النتيجة...

 

الفرشاية مو ناعمة مرا ولا خشنة مرا عادية

ع قد ما حاولت أمررها ع أنفي ما قدرت...أحس يجيلي ارتجاج في المخ لوووووول

والرقبة كمان ماقدرت...غثيااااان و حسيت حرجع الله يكرمكم

 

الفرشاية تشتغل لمدة دقيقة كاملة بدون توقف...لما يقولوا 20 ثانية للجبهة و 10 ثواني لكل خد...انتي تقدري الوقت تقدير

واذا وقفت الفرشاية بعد دقيقة...وحسيتي انو بشرتكي لسا محتاجة عادي كلها كبسة زر وترجع تشتغل

أوقات أستخدمها بس ع جبهتي ودقني...و أوقات أشغلها مرتين يعني لدقيقتين

 

بشرتي عادية وماشاء الله والحمدلله صافية

النتيجة اللي أحسها بعد كل استخدام...نعومة و كأنو البشرة مصقولة و منورة

النضارة تختفي بعد ساعة أما النعومة و مظهر البشرة المصقولة يستمر طول اليوم

 

مرت عليا ظروف ما قدرت أستخدمها ليومين...تخيلوا انو بشرتي رجعت عادية كأني بحياتي ما استخدمت كلاريسونيك

يعني ما تعطيكي نتيجة دائمة

 

بعد استخدامها باسبوعين طلعت لي حبة بخدي

 

 

 

 

أول ما تشتري الجهاز...لازم تشحنيه لمدة 24 ساعة...بدون انقطاع...يعني ما تشبكي و تفصلي لأنو كدا حيخرب الشاحن

طبعا زي ما انتو شايفين ما لها مدخل يو اس بي

الشحن يكفيكي استخدام تقريبا اسبوع

 

 

 

 

 

 

 

 

كدا يتشبك الشاحن...بس تحطيه ع الجهاز وتحسي كأنو في مغناطيس يمسك فيه

 

 

 

 

 

 

وقت الشحن حتكون في لمبة صغير تولع وتطفي...و اذا اكتمل الشحن تولع وتستمر منورة

 

 

سعرها 125 دولار

يعني 469 ريال

 

الشحن الداخلي مجاني

 

كنت طالبة كمان فراشي ريل تكنيكس و فراشي كوستال و شوية اكسسوار للتسريحة...وكلفني شحنهم كلهم 150 ريال واصل لباب البيت

 

 

أتمنى انو دا البوست كان اجابة شافية لكل وحدة تسأل عن كلاريسونيك