خطوات الروتين الناجح❤️

كل وحدة فينا لها روتين عناية خاص فيها...نختلف في الطريقة و المنتجات لكن في أساسيات لابد منها بكل روتين

في بنات يستصعبوا موضوع الروتين...ويحسوه شي مرا صعب و ان استمروا عليه اسبوع اسبوعين لكن في الأخير يملوا و يتركوه

الروتين المفروض يكون شي بسيط و سهل...لأنو مو شي شهر و توقفيه...لأ...هو نظام حياة راح يستمر معاك العمر ان شاء الله

قبل ما تقرري عمل روتين خاص فيك...حطي ببالك الشي اللي تقدري تستمري عليه ع طول...لا تتحمسي و تعملي جداول و ما تخلي خلطة الا و جمعتي مقاديرها شي من عطار و شي من الصيدلية...لا تجمعي منتجات كثيرة...لأنك اذا أرهقتي نفسك صدقيني مستحيل تستمري...الا اذا انقطعتي عن العالم لأنو كل خمسة دقايق عندك خلطة...

الروتين شي تظيفيه لحياتك و ما ياخد منك الا ساعة في اليوم...و باقي اليوم لك...لدوامك ونومك و راحتك و لكل الأنشطة الباقية.

اذا بديتي روتين...لا تستني نتايج و تحلمي فيها و ترفعي سقف توقعاتك...استمري ع الروتين و لا تدققي...لأنو طالما انتي متحمسة لنتيجة حتملي و تحبطي.

حكتب لكم روتين أساسي...للبنات اللي مو عارفين كيف يبدأوا...ان شاء الله يساعدكم...دا الروتين يناسب الصغيرة و الكبيرة الموظفة و الطالبة و العاطلة و المتزوجة الفاضية و المشغولة

طبعا دا مو روتيني أنا...المنتجات اللي أنا أستخدمها تختلف
و في بعض الاضافات 
بس اللي راح أنزلو دحين هو روتين افتراضي بس عشان تعرفوا الخطوات الأساسية

راح تبدي روتينك اليومي...بالشور ...اختيار الشور جل أو الشور كريم يعتبر أول خطوة في الروتين...الشور جل للبشرة الدهنية و الشور كريم للجافة...كتبت التفاصيل ببوست ع الانستغرام ممكن ترجعوا له...

بعد الشور...ترطيب كامل الجسم...و استخدام الديودرنت أو مزيل رائحة العرق...و اذا كنتي جالسة في البيت استخدمي سبري...

الاسبري شي راجع لك...اذا حابة تستخدميه أو تستبدليه بباودر

الروتين اليومي للبشرة...غسول مع الاسفنجة...بعدو تونيك...بعدو مرطب للبشرة...و آخر شي مرطب الشفايف

و اذا كنتي حتخرجي في الشمس استخدمي صن بلوك

هنا يبدأ يومك...حيكون عندك وقت ملكك لحياتك...بدل ما تقضيه بين الخلطات

قبل النوم...اذا كنتي حاطة ميك أب نظفيه بمزيل الميك أب

بعد تنظيف الميك أب...كرري نفس خطوات الصباح...بس استبدلي الكريم المرطب بكريم له خصائص علاجية...ع حسب احتياج بشرتك...مثلا كريم شد أو تفتيح أو كولاجين...و لا تنسي مرطب الشفايف

كدا انتهينا من الروتين اليومي...و راح يكون عندنا روتين اسبوعي

الروتين الاسبوعين...حتختاري يومين في الاسبوع...مثلا الأحد و الأربعاء...و تعملي فيهم تقشير للبشرة و ماسك أو قناع سواء جاهز أو طبيعي من البيت...و تقشير لجسمك بالكامل...

و مرة في الاسبوع...تعملي ماسك أو قناع لشعرك

كل اسبوعين شقري حواجبك

الروتين الشهري

مرة في الشهر...اعملي بديكير و مونيكير...و حمام مغربي...و أزيلي شعر جسمك بالطريقة اللي متعودة عليها

لا تجمعيهم بيوم واحد...خليهم متفرقين و باعدي الأيام بينهم...أهم شي انو ما يمر الشهر الا و انتي عاملتهم

و بكدا حيكون لك روتينك الخاص...و أنا أضمن لك باذن الله الاستمرار لأنو أبدا ما يملل...و حتكوني ع طول مستعدة لأي مناسبة و مرتبة ع طول

لا حظتوا شي في البوست؟

انو كل المنتجات هي منتجات عادية و أسعارها مقدور عليها و متوفرة...ما تحتاج طلبية من الواق واق و لا تاجرة و لا غيرو...

البشرة الصافية موجودة قبل الكلاريسونيك بعشرات السنوات

لو الكلاريسونيك أو منتجات العناية الحديثة كانت هي سبب البشرة الصافية الموحدة ما كنا شوفنا البشرات الصافية اللي كانو ما يعرفوا الا الفازلين والشامبو الأحمر

بس اختاري المنتج اللي يناسبك و استمري

لا تتحججي...لا تدوري لنفسك الأعذار...لا تقولي أنا ما أعتني عشان ماعندي منتج كذا و منتج كذا

لا تشتري...افرزي كل اللي موجود عندك...أنا عارفة اني لو حفتش غرفكم حلاقي عندكم خير و منتجات أكوام أكوام...

يلا...اش تستني؟...قومي دحين اللي منتهي تاريخو أرميه...و اللي ما ناسبك اش مستنيه؟ ليه محتفظة فيه؟...شوفيلك وحدة يناسبها و أعطيها أختك أو قريبتك أو شغالتكم...كدا خلاص رتبتي أغراضك؟

ابدي روتينك اليوم...اليوم مو بكرا

ممكن تضيفي ع الروتين شوية اضافات ع حسب احتياجك...شوية اضافات مو جداول

وبس...أنا أحبكم

حبيتوا البوست؟