صباح الخير
المفروض يكون البوست عن مشتريات شهر أكتوبر
بس بما انكم فضلتوا بوست الميزانة راح أأجل بوست المشتريات
قبل ما أبدأ...حابة أقول شي...نكون صريحين الشريحة الأكبر في مجتمعاتنا وضعها المادي متوسط...ما راح أجيب سيرة الغلاء ولا القروض اللي تكسر الظهر و لا الايجارات و لا الفواتير المرتفعة
دي الأشياء كلنا معترفين بوجودها في المجتمع و بكل بيت تقريبا
راح أتكلم بشفافية و واقعية و راح يكون كلامي بناءا ع الأقل
و كل وحدة تطبق ع حسب امكانياتها...مثلا اذا قولت 100 ريال...انتي شوفي ال 100 ريال كم تعني لك...في ناس تعني لهم 500 ريال و في ناس تعني لهم 10 ريال.
اتفقنا؟
اش مفهومنا للميزانية؟
باختصار دخلنا الشهري و فين نصرفو و كيف نصرفو؟
ثقافة التدبير و الادخار في ناس يعتبروها بخل!
بالعكس هي ذكاء.
اذا أنا أستفيد من دخلي و أعرف كيف أوزعو بطريقة صحيحة بحيث اني أغطي كل جوانب حياتي المعيشية و مستلزماتي و أعمل توازن
أنا أكون انسانة واعية و مدركة
في بنت دخلها الشهري 500 ريال و كل شهر تكرر نفس المشتريات و تنقصها أشياء كثيرة
و في المقابل بنت عندها نفس الدخل لكنها عرفت كيف توزعو صح و نلاقيها مغطية كل احتياجاتها.
في بنت صرفها كلو ع الملابس...و لو تبغى تخرج تستلف من اخواتها ميك أب.
و بنت صرفها ع الميك أب... ولو تبغى تخرج ما عندها شي تلبسو
أعرف انها ميول...لكن سددي و قاربي.
اعرفي فين تصرفي فلوسك و ابعدي عن التكرار
كيف أسوي ميزانية خاصة فيا؟
راح أبدأ من أصغر شريحة و أقلهم دخل.
اللي هم طالبات المدارس.
انتي نفسك تشتري مثلا شي ب 200 ريال.
و ما عندك...ليه ما عندك؟
لأنك تاخدي مصروف شهري نقول مثلا 50 ريال.
الخمسين ريال ما حتسويلك شي لأنك تصرفيها بوقتها و يمكن ع أشياء تافهة.
نظام تجزأة المصروف ما ينفع.
اش رايك تعملي جمعية مع اخواتك و اخوانك في البيت أو حتى صاحباتك في المدرسة؟
مروا عليا عائلة ماشاء الله أطفالهم في الابتدائي و يعملوا جمعية اسبوعية بعشرة ريال...عددهم 3 و الأم و الأب داخلين الجمعية معاهم كتشجيع لهم.
كل واحد يدفع نهاية الاسبوع 10 ريال...و بنهاية كل اسبوع شخص واحد منهم يحصل على 50 ريال.
الأم تقوللي انو أطفالها صاروا يجمعوا فلوسهم و يتشاركوا في ألعاب البلاي ستيشن.
حلو انو نزرع ثقافة التوفير و الاعتماد ع النفس و تحقيق الأهداف في الأطفال
طيب ننتقل للبنات اللي دخلهم أكثر بشويا.
مهما كان دخلك...300 أو 500 أو اللي يكون.
أقسميه لجزئين...جزء تصرفيه ع الاحتياجات...و جزء خليه توفير للكماليات و للطواريء.
أول قاعدة تحطيها قدام عيونك و بقناعة تامة : ليس كل ما تشتهي تشتري.
حاولي تفرقي بين اللي تحتاجيه و اللي نفسك فيه.
- دائما اعتمدي على الليستة..و اقسميها لجزئين:
ليستة خاصة بالاحتياجات و اللي فعلا تحتاجيها و تنقصك...و يكون تحقيقها قريب المدى.
و ليستة خاصة بالكماليات و اللي هي الأشياء اللي نفسك تشتريها لكن ما تحتاجيها...و يكون تحقيقها بعيد المدى.
نبدأ بليستة الاحتياجات:
- قومي الآن و افرزي كل اللي عندك ملابس على ميك أب على منتجات عناية...اللي منتهية صلاحيتو أرميه...و اللي باقيلو مدة بسيطة حطيه ببوكس أو في درج أو ع التسريحة عشان يكون قدام عينك و تقدري تخلصيه.
اللي ما ناسبك أعطيه اخواتك.
و سجلي اللي تحتاجيه...اللي تحتاجيه يعني الشي اللي لازم تشتريه و ما عندك بديل له.
أكيد وقت الفرز حتلاقي مثلا شور جل شور جل شور جل شور جل...و انتي ما عندك سكرب أو مقشر!
سجلي في ليستة الاحتياجات سكرب.
- كل شهر خصصي الميزانية لاحتياجات معينة.
مثلا دا الشهر لاحتياجات العناية...و حاولي تدخلي الصيدلية مثلا و تروحي بشكل مباشر للشي اللي تبغيه و حاسبي عليه و اخرجي عشان ما تشوفي أشياء ثانية و تشتريها و انتي ما تحتاجيها.
الشهر اللي بعدو خصصيه للي ينقصك من الملابس و حاولي تنوعي...و قبل ما تروحي حددي الشي اللي تبغيه و لا تدخلي الا المحل اللي انتي رايحة عشانو.
الشهر الي بعدو خصصيه لتدليع نفسك...روحي الصالون و شوفي انتي اش تحتاجي تنظيف أو قص ....الخ.
واللي بعدو شوية أغراض و كماليات لغرفتك.
لاحظوا...انو خلال أربعة شهور قدرنا نوفر لنفسنا أشياء كثيرة عن طريق تخصيص ميزانية كل شهر لجانب معين.
المهم ابعدي عن التكرار و حاولي تغطي كل جوانب احتياجاتك.
طيب و جزء التوفير؟
مثلا اذا مصروفك 500...استقطعي منو شهريا 200 ريال ووفريها على جنب.
ال 200 ريال خليها لتحقيق أهدافك...اش هي الأهداف اللي نبغى نحققها؟
هي المشتريات الكماليات...اللي بعيدة الأجل...ما نكون محتاجينها في الوقت الحالي...و نفس المبلغ راح يتوفر لك في حال احتجتي شي طاريء.
راح أعطيكم مثال:
لو حطيتي ببالك تحقيق هدفك بعد سنة...و وفرتي 200 ريال شهريا...بعد سنة راح يكون معاك 2400 ريال.
دا المبلغ خصصيه للكماليات.
كل وحدة و ميزانيتها.
بعض الخطوات اللي راح تفيدك ان شاء الله:
- ما نقص مال من صدقة.
- اذا انتي من البنات اللي يتأثروا بالدعاية و تحفزهم للشراء و ما تقدري تسيطري ع نفسك لا تتابعي الحسابات التجارية أو اللي تحفزك انك تشتري.
- لا تروحي المول اذا ما كنتي تحتاجي شي ضروري.
- عودي نفسك و أطفالك ما تخرجوا من البيت الا و انتو آكلين وجبتكم...لا تخرجي و انتي حاسة بالجوع أبدا الا في حالة وحدة اذا كنتي خارجة و انتي مقررة بمخططك انتي تتغدي أو تتعشي برا البيت.
-اذا كنتي رايحة تشتري أغراض للبيت من السوبرماركت...لا تروحي و انتي جيعانة لأنك راح تشتهي كل شي و راح تشتري كل اللي تحتاجيه و اللي ما تحتاجيه.
- انتبهي من تجميد الميزانية...يعني لا تشتري شي لمجرد التخزين...أو لمجرد يمكن أحتاجو.
- لما ينزل راتبك أو مكافأتك الجامعية...بعد ما تسددي الفواتير اللي عليك اسحبي كامل المبلغ لا تخلي شي في حسابك...
احتفظي بالمبلغ في مكان آمن في البيت...
لما يكون في حسابك راح تدفعي بالبطاقة و ما حتعرفي فين راحت المبالغ و ما راح تحسي بالصرف.
- استغلي فترة التخفيضات...شوفوا أول بوست في المدونة..اتكلمت فيه عن كيف نتسوق وقت التخفيضات بطريقة ذكية.
- قنني حياتك و رتبيها...لا تفرطي و لا تحرمي نفسك...مو لازم مطعم أو كوفي كل يومين...من تجربة صاحبتي لما حددوا هي وزوجها خرجة المطعم مرتين في الشهر اتوفر معاهم 3600 ريال...و ماكانوا يتخيلوا انهم يصرفوا دا المبلغ شهريا ع المطاعم.
- أي شي من الكماليات و سعرو أكثر من 1000 ريال أجلي شراؤه...يمكن رغبتك له تقل.
أكيد صارت معاكم...انو في شي تبغوه اليوم و باصرار و حماس...و بعد اسبوع مثلا تختفي دي الرغبة.
معنى كدا انو مجرد نزوة و حاجتك له مو حقيقية.
- دي الطريقة يستخدموها لمعالجة ادمان التسوق...لما تدخلي محل اللي يعجبك و تبغي تشتريه خليه بيدك و لا تروحي للكاشير و تحاسبي عليه ع طول...خودي لفة في المحل اتفرجي...بعدين ارجعي شوفي الأشياء اللي اخترتيها...و اسألي نفسك...هل أنا بحاجتها فعلا؟...80% من الأشياء اللي عجبتك و كنتي حتشتريها حترجعيها...لأنو في النظرة الأولى حيكون مجرد اعجاب و حب تملك...بس بعدين يبدأ العقل يشتغل انو أنا أساسا ما أحتاجها.
- التخطيط...اذا عندك مناسبة بعد 4 شهور...لا تزنقي نفسك بنفس الشهر و تحاولي تغطي كل احتياجاتك و تتأزمي...ابدئي من الآن...و جيبي ظرف و اكتبي عليه مناسبة كذا و حطي فيه مبلغ معين شهريا.
- لا تستهيني بالمبالغ الصغيرة...دايما خلي بشنطتك شنطة صغيرة للعملات المعدنية الأنصاص و للريالات...اجمعيها فيها راح تتفاجئي بالمبلغ.
زوجي يكره الريالات...لازم يخرج الريالات من محفظتو...مثلا لو نوقف عند المحطة و يرجعلو الباقي ع طول ياخد الريالات و يرميها في السيارة و الباقي يحطو في المحفظة.
البيت صار كلو ريالات...صرت أجمعها من كل مكان
من دروج التسريحة و غرفة المعيشة حتى في المطبخ خخخخخخ
مرا بعد ما جمعتها عديتها و طلعت قريب ال 300 ريال
- التجميع من أسوأ العادات...مثلا تدخلي محل و تعجبك بكلة شعر بخمسة ريال...تروحي تشتري منها كل الألوان...ليه طيب؟
ليه التجميع و التكديس؟...صدقيني كلها يومين و راح تشوفي بكلة أحلى منها و تعجبك و تركني اللي قبل.
في بنات يجمعوا كفرات الجوالات...لو اشتريتي خمسة بنفس الوقت صدقيني حتملي منها بسرعة و ما راح تعطي نفسك مجال للتجديد
- محلات أبو ريالين و التخفيضات...أنا أسميها محلات القرابيع ههههههههه...ممتعة لكنها تخدعك...تسترخصي المبلغ...ريالين بس...خمسة ريال بس...واااااو معقولة بريال بس...و هاتك يا قش...و لما تيجي تحاسبي تتفاجئي بالمبلغ.
و لو فندتيها حتلاقيها أشياء مو مهمة.
البوست طويل...حوقف هنا...اذا حبيتوه و حسيتوا انكم استفدتوا حكمل بجزء ثاني ان شاء الله.
أحووووبكم
يعطيك الف عافيه يا رب تسلم هالايادي واكييييد حبينا البوست منتظره الجزء الثاني بفارغ الصبر 😘💜💜💜
ردحذفيعطيك العافيه يالحب😘
ردحذفكممملي مره حلو
ردحذفوفي النهايه لو نحكم عقلنا شويه بتترتب امورنا ،، جدا جميل يعطيك العافيه واكيد كملي
ردحذفحبيت البوست جداا واطالب بالمزيييد
ردحذفيعطيك الف عافيه
يعطيك العافيه
ردحذفسموره حبيت أسألك ..انا من النوع اللي كل أسبوع تقريبا اخرج المووول! وعندي عاده اي شي يستاهل وسعره لقطه اخذه حتى لو ماا احتاجه ف الوقت الحالي ...بس بعد فتره لما افتح دولابي ألقى هالقطعه وتفك ازمه ..اللي يقهر عندي قطع كثيره ما انلبست .. وميزانيتي متوسطه ..
ردحذفالحمدلله انا انسانة مرتبة ميزانيتي كويس بجيب احتياجاتي اﻻولوية وبعدها الكماليات .. بس اكتر شي يخرب ميزانيتي هيا الهدايا والواجبات حق الزيارات احيانا تكون اكتر من مرة ف الشهر وجدد احس انو ميزانيتي خربت على طول وغالبا تكون ضروريه
ردحذفمررررة حبيييت البوست ياليت تسوي جزء تاني ♥
ردحذفأنا صح اصرف فلوسي كتيير لكن ازا كنت ناوية اشتري حاجة اجمع فلوسي وامسكها مزبوط
لكن لو مافي بالي شي اصرف بس =))
لكن ان شاء الله راح اسوي نفس كلامك
بالنسبة للفلوس انا احب احطها في البنك لأني بالعكس لو كانت الفلوس في يدي اصرفها على اشياء سخيفة
اما ازا كانت في البنك تكون كأنها في حصالة ههه
يعطيكي العافية مررة مفيد البوست ♥♥
بوست قميل زي صاحبتوه
ردحذفالله يسعدك يارب على هل معلومات مرررة استفدت منك وانا حقيقة اعاني اني ما اعرف كيف اصرف ميزانيتي الله يهنيك يارب على هذا الكلام المفيد
ردحذفربييي يسسسسععدك بوسست جدا مفيد وجميل بجمالك وجمال روحك ربي يحقق لك كل ما تتمني
ردحذفبوست جداً مفيد وياليت الجزء الثاني ينزل
ردحذفموضوع مره مهم
ردحذفوخصوصاً اني تجيني فتره المكافأه بيومين بس واجلس بقية الشهر اطلب من ابوي 🙊
انا فاشلة في ادارة فلوسي :( شكرا على البوست
ردحذفحبيت البوست مفيد واتمنى تكملي الجزء الثاني
ردحذفحيييل حلوو الموضوع سمورة كملي نبي جزء ثااني��
ردحذف