Winter skin care routine...روتيني الشتوي

 

 

 

 

 

 

أول شي حقولكم عليه نوع بشرتي و كيف تصير في الشتوية

بشرتي عادية بس في الشتوية تصير جاااافة جافة و حساسة خاصة خدودي و أنفي و يدي يصير فيهم احمرار من التحسس

و شوية قشور ع الخدود و الأنف تبين مع الميك أب

عشان كدا بشرتي تحتاج عناية مكثفة في الشتوية خاصة الترطيب

دا البوست حيكون عن روتين عنايتي في السنوات الأخيرة و اللي ناسبني جدا مع شوية اضافات

في أشياء ثابتة...زي الحمام المغربي مرة في الشهر

و ابتعدوا عن الاستحمام بالمويا الحارة لأنها دماااار للبشرة...تزيد الجفاف و تسمر و ترهل...استحمي بمويا دافية معتدلة

 

 

سيتافيل...غسول طبي ما يجفف البشرة و لا يحسسها أبدا...يستخدم للوجه و الجسم...بس أنا راح أستخدمو لجسمي مع ليفة بودي شوب

استخدامي له في الشور اليومي

 

 

 

أوقات أغير و أستخدم شور معطر...و أنصحكم بباث آند بودي ووركس...رغم انو شوراتهم معطرة لكنها ما تجفف و لا تسمر و لا تحسس البشرة...و من أجمل الروائح الشتوية ميد نايت...مرا أحبها

و لاحظوا اني أستخدم شور كريم مو شور جل لأنو بشرتي جافة.

 

 

الفرق بين الشور جل و الشور كريم...انو الشور كريم يناسب البشرة الجافة لأنو نسبة الكريم المرطب فيه أعلى وتحسي قوامو كريمي...أما الشور جل فتركيبتو صابونية أكثر و نسبة ترطيبو أقل و يناسب البشرة الدهنية

 

شرحت الفرق بشكل مفصل ع الانستغرام في هاشتاق سوسانيتا_تيبز...حسابي sosanita90

 

 

 

 

مجموعة أنانيا من بودي شوب...ارتبطت عندي من سنوات بالشتوية...بس ما أعتمد عليها في الترطيب نهائي...أستخدم كريمي المرطب على كامل جسمي...و أرجع أحط لوشن أنانيا بس ع رجولي و يدي عشان ريحتو فقط

الشور جل طاح مني و انكسر ههههههه

صار ما يتقفل

 

 

 

 

لوشن فازلين...استخدمت كل أنواع فازلين و لقيت أفضلها هو اللي بزبدة الكاكاو و دا النوع...دا النوع ترطيبو عالي و يستمر لساعات...بس برضو مو أحسن من ترطيب هيمالايا...بس يخلص ان شاء الله حرجع أشتري هيمالايا...مرطبات هيمالايا اتكلمت عنها في بوست منتجات ما أستغني عنها...هنا ع المدونة

 

 

 

 

سكرب بايو...من أروع السكربات...و صارلي أستخدمو سنتين...و حستمر عليه حتى في الشتوية ان شاء الله لأنو ما يجفف...و حخلي تقشير الوجه مرة في الاسبوع ان شاء الله

 

 

 

 

 

 

 

تقشير الجسم...كمان حكمل مع بايو...بس ف كل مرة أستخدمو راح أضيف عليه ملعقة صغيرة زيت...عشان يعطيني ترطيب

 

 

 

بشرة وجهي...من خمسة شهور تقريبا استخدمت دا الماسك للبشرة الحساسة و المجهدة من شركة فرنسية...ينور البشرة و يخليها مرتاحة و فيها نضارة...و مرا ناسبني...رجعت طلبت الغسول من نفس المجموعة و راح أستخدمو بشكل يومي في روتيني ان شاء الله

 

الغسول حيكون يومي في النهار و قبل النوع...و الماسك مرة في الاسبوع

 

الغسول و الماسك طلبتو من دا الحساب

 

mtgr_almaddinah

 

 

 

تفتكروا لما استخدمت مقشر جلايكوليكس في الصيف و سمرني؟

دي غلطتي طبعا لأنو معروف انو أي مقشر ما تستخدميه في الصيف لأنو حيعطيك نتيجة عكسية.

المهم اني وقفت استخدامو ع طول...و دحين جالسة أكمل استخدامو في الشتوية

في بوست كامل عن لاين جلايكوليكس هنا في المدونة

 

 

 

 

 

لوشن دوكري...لوشن معالج للجفاف وصفو ليا الدكتور شتوية السنة اللي فاتت و الحمد لله ناسبني مرا...و كنت أستخدمو حتى لجولي...و رجعت أستخدمو دي السنة كمان

 

طبعا هو للجسم و الوجه

 

استخدامي له بشكل يومي لكامل الجسم...و الوجه

 

 

 

 

دا سيروم الأرغان اشتريتو من نفس الشركة اللي أخدت منها الماسك و الغسول...نقطة وحدة منو تكفي...أوزعو ع أطراف شعري و الحمدلله ناسبني

شعري كمان يجف مرررااا في الشتوية ف راح أستمر عليه ان شاء الله

 

 

 فازلين الوردي تبع الأطفال

 

 دا كمان من ضمن روتيني أنا و جولي...أستخدمو بعد الشور و جسمي مبلول...لأنو يحفظ الرطوبة في البشرة

ويدفي

 

واللي فيهم أكزيما جربوا دي الطريقة و ان شاء الله حتشوفوا نتيجة تبهركم

 

و كمان أستخدمو لرجولي يوميا و بعدو ألبس شراب

 

 

 

و بس دا روتيني...و الحمد لله ناسبني و حل مشاكل الجفاف عندي و اللي كنت ما تنتهي الشتوية الا و أنا فيا كم بقعة غامقة من آثار الجفاف و التحسس

 

 

.....